Մեկ ամիս առաջ ԱԳՆ-ից ասում էին՝ Թուրքիայի հետ որեւէ շփում չկա, ոչինչ չի կատարվում, երեկ մենք Թուրքիայից ենք իմանում, որ հատուկ բանագնացներ են նշանակվելու: Այս մասին Հանրային հեռուստաընկերությանը տված հարցազրույցում ասել է ԱԺ «Հայաստան» խմբակցության պատգամավոր Աղվան Վարդանյանը՝ անդրադառնալով Հայաստանի եւ Թուրքիայի իշխանությունների կողմից արված պաշտոնական այն հայտարարություններին, որ կողմերը հատուկ բանագնացներ կնշանակեն հարաբերությունների կարգավորմանն ուղղված քայլերը քննարկելու համար:
«Եթե դու սուբյեկտայնություն ունես ու ինքնիշխան պետություն ես, քո հարաբերությունները չես կարգավորում միջնորդների միջոցով: Այդ հարաբերությունների գաղափարի ջատագովներից մեկն այսօր ասել էր, որ Հայաստանն Ադրբեջանից ու Թուրքիայից վտանգ չունի, Ժիրայր Լիպարիտյանին նկատի ունեմ: Փաստորեն, Ադրբեջանից ու Թուրքիայից վտանգ չկա, իսկ պարոն Լիպարիտյանի կարծիքով՝ վտանգ ունե՞նք Ռուսաստանից, Իրանից, ԱՄՆ-ից, ԵՄ-ից, թե՞ ոչ մեկից չունենք, փաստորեն, ամենաանվտանգ երկիրն ենք հիմա, եւ սա այն գաղափարախոսությունն է, որ ձեր սիրած իշխանությունն առաջ է տանում»,- նշեց պատգամավորը:
Անդրադառնալով ԱԺ արտաքին հարաբերությունների մշտական հանձնաժողովի նախագահ Էդուարդ Աղաջանյանի այն հայտարարությանը, որ հայ-թուրքական հարաբերությունների հաստատման գին չի կարող լինել, չի կարող դա ուղեկցվել որեւէ նախապայման, Վարդանյանը նկատեց:
«Ես ԱԺ-ում հայ-թուրքական հարաբերությունների մասին հարց էի տվել կառավարությանը, խնդրել էին գրավոր պատասխանել, որ մի սխալ բան չասեն: Ասել էի՝ կա ՀՀ ՍԴ որոշում, ըստ որում հստակ գրված է. առաջինը՝ հայ-թուրքական հարաբերությունները չեն կարող կապվել երրորդ կողմի հետ, այն է՝ Ադրբեջանի, երկրորդ՝ Անկախության հռչակագրի 11-րդ կետը ցեղասպանության վերաբերյալ սրան չի կարող վերաբերել, եւ երրորդ՝ չի կարող սա հակասել նաեւ ՀՀ Սահմանադրության նախաբանին: Հիմա որ ասում եք՝ այդ մարդն ասել է՝ առանց նախապայմանների է լինելու, ես միշտ առաջարկում եմ սպասել եւ տեսնել: Կառավարության գրավոր պատասխանում ասվում է՝ սա եղել է ա՜յն Ցյուրիխյան արձանագրությունների մասին՝ առանց հասկանալու, որ դու պետություն ես, որ ՍԴ որոշումը վերաբերում է պետության ամբողջ ընթացքին, եւ պետությունը 0-ից չենք սկսել, ինչպես այլ հարցերում»,- նկատեց Վարդանյանը:
Դիտարկմանը, որ թե՛ առաջին, թե՛ երկրորդ, թե՛ երրորդ նախագահներն են կողմ եղել Թուրքիայի հետ հարաբերությունների կարգավորմանն առանց նախապայմանների, այնպես էլ այժմ Նիկոլ Փաշինյանը, պատգամավորը նկատեց.
«Դուք մոռացել եք կարծեմ, որ եղել է 44-օրյա պատերազմ, որին հնարավոր բոլոր միջոցներով ակտիվորեն մասնակցել է Թուրքիան, ունենք այս աղետալի հետեւանքները, եւ նկատի չեք ունենում մեկ փաստ եւս՝ երբ Հայաստանը միջազգային ատյաններում փորձում է դատի տալ Ադրբեջանին, մոռանում է նշել Թուրքիայի անունը, նույն ՄԻԵԴ-ում ասել, որ Թուրքիան էլ է զինուժով, վարձկաններով, Բայրաքթարներով մասնակցել այդ ամեն ինչին: Եվ երբ որ իմ հարցին կառավարությունն այդպես է պատասխանում, այդ դեպքում ես ունեմ բոլոր հիմքերն ու համոզմունքը, որ այդ գործընթացն առանց նախապայմանների գոյություն չի ունենալու»,- արձագանքեց Աղվան Վարդանյանը:
