Թուրքական «Բայրաքթար» մարտական անօդաչու թռչող սարքերի (ԱԹՍ) առաքումները Ուկրաինա Ռուսաստանի հասարակության մեջ ցավագին են ընկալվում։ Այդ մասին երկուշաբթի օրը հայտարարել է Թուրքիայում Ռուսաստանի դեսպան Ալեքսեյ Երխովը՝ Aydinlik թերթին տված հարցազրույցում։
«Չեմ կարող չանդրադառնալ մի հարցի, որն ինձ այստեղ հաճախ են տալիս՝ ինչպե՞ս ենք վերաբերվում թուրքական «Բայրաքթարի» առաքումներին Ուկրաինա։ Դե, ես լիովին անկեղծ կլինեմ. դուք չեք էլ պատկերացնի, թե որքան ցավալի են այդ առաքումները ընկալվում է ռուսական հասարակության մեջ: «Բիզնեսը բիզնես է» բացատրությունները նրանք չեն հասկանում, քանի որ ձեր անօդաչու թռչող սարքերը սպանում են մեր զինվորներին, և Ուկրաինայում դրա համար են դրանք գնում։ Մոսկվան զենք չի մատակարարում այն երկրներին, ում դեմ կռվում է Թուրքիան, և դուք դա լավ գիտեք», - ընդգծել է դիվանագետը։
Թուրքիան վերջին տարիներին հիմնել է մարտական անօդաչու թռչող սարքերի արտադրություն ոչ միայն իր զինված ուժերի կարիքները հոգալու, այլ նաև արտահանման համար։ Այս պահին արդեն վեց պետություններ ունեն «Բայրաքթար» անօդաչու թռչող սարքեր՝ Ադրբեջանը, Քաթարը, Լիբիան, Մարոկկոն, Լեհաստանը և Ուկրաինան։ Այս տեսակի անօդաչու թռչող սարքերն օգտագործվել են Լեռնային Ղարաբաղում, Սիրիայում և Լիբիայում մարտական գործողություններում։
2021 թվականին Թուրքիան Ուկրաինային մատակարարել է «Բայրաքթար» հարվածային անօդաչու թռչող սարքեր, որոնք հետագայում օգտագործվել են Դոնբասում, ինչն արգելված է Մինսկի համաձայնագրերով։ Ուկրաինայի զինված ուժերի կողմից դրանց կիրառման մասին հաղորդագրությունների վերաբերյալ մտահոգություններն այնուհետև արտահայտվել են Գերմանիայի և Ֆրանսիայի արտաքին գործերի նախարարություններում, գրում է ՏԱՍՍ֊ը։
