Եվրահանձնաժողովը Մեքսիկայի իշխանություններին կոչ է արել ձերբակալել Ռուսաստանի ղեկավար Վլադիմիր Պուտինին, եթե նա հոկտեմբերի 1-ին մասնակցի Մեքսիկայի նորընտիր նախագահ Կլաուդիա Շայնբաումի երդմնակալության արարողությանը։ Դրա մասին Euractiv-ին տված մեկնաբանությունում ասել է Եվրոպական հանձնաժողովի արտաքին քաղաքականության ներկայացուցիչ Պետեր Ստանոն։

Մեխիկոյում երդմնակալության արարողությանը Պուտինի՝ մասնակցելու հրավերն ընդունելու դեպքում Մեքսիկան, որպես Միջազգային քրեական դատարանի Հռոմի ստատուտի մասնակից, իրավաբանորեն պարտավոր է ձերբակալել ՌԴ առաջնորդին, որի նկատմամբ կալանավորման հրամանագիր կա, հայտարարել է Ստանոն։

«Ուստի վստահ ենք, որ Մեքսիկան, որպես ՄՔԴ անդամ, կկատարի իր պարտավորությունները», - հավելել է նա:

Եվրահանձնաժողովի խոսնակը նշել է, որ Մեքսիկան մասնակցել է հունիսին Շվեյցարիայում անցկացված խաղաղության գագաթնաժողովին, որտեղ համաձայնություն է ձեռք բերվել, որ Ռուսաստանը պետք է դադարեցնի պատերազմն Ուկրաինայի դեմ, և ՄԱԿ-ի քվեարկության ժամանակ դատապարտել է ռուսական ագրեսիան և Ռուսաստանին կոչ արել դադարեցնել պատերազմը։