Lragir.am. «Սա ծրագիր չէ, սա լավագույն դեպքում հռչակագիր է, որն իր մեջ պարունակում է մշուշոտ ապագա ունեցող երկրի տեսլական: Այս փաստաղթղթով իշխանությունը ևս մեկ անգամ նսեմացնում է երկրի Սահմանադրության նշանակությունը»,- այսօր ԱԺ ճեպազրույցների ժամին հայտարարեց ՀՅԴ խմբակցության պատգամավոր Արծվիկ Մինասյանը՝ անդրադառնալով կառավարության նոր ծրագրին:
Պատգամավորը նշեց, որ դեմ են քվեարկել այս փաստաթղթղին այն պատճառով, որ մի շարք խնդիրներ ներառված չեն ծրագրում, մասնավորապես՝ նոր Ատոմակայանի կառուցման հարցը, տրանսպորտի ոլորտի, էներգետիկ անվտանգության, ազգային փոխադրողի մասին խոսք չկա: Հայաստանի իշխանություններն, ըստ նրա, ունակ չեն իրականացնելու հիմնավոր լուրջ բարեփոխումներ երկրում:
Նա նշեց, որ ընդդիմության փաստարկված քննադատություններին իշխանությունը միայն վիրավորանքով պատասխանեց ծրագրի քննարկման ժամանակ:
«Մտքի հեղափոխության արտահայտությունը հերթական անգամ օգտագործվում է՝ քողարկելու համար անպատրաստ իշխանության գործելաոճը: Առաջին հերթին, իշխանությունը պետք է պատրաստ լինի, որ բարեփոխման արդյունքում կարող է զրկվել իշխանությունից: Այս հեղափոխության ծիլերը մենք չտեսանք»,-ասաց պատգամավորը:
Անդրադառնալով Գալուստ Սահակյանի ելույթին, թե՝ «եթե նախագահը չլիներ, բա դուք ի՞նչ կլինեիք», Արծվիկ Մինասյանը նշեց, որ Գալուստ Գրիգորիչը փայլում է իր մտքի գոհարներով: «Եթե իշխանությունը չլիներ նախագահի գլխավորությամբ, երևի Դաշնակցությունը կլիներ իշխանության: Իրականում նա գցեց նախագահի դերն ու նշանակությունը, բացահայտեց իշխանության դեմքը»,- ասաց Մինասյանը՝ նշելով, որ Դաշնակցության պահանջները Գալուստ Սահակյանի շուլուխին վնաս չէ:
Ինչ վերաբերում է Գալուստ Սահակյանի այն արտահայտությանը, թե իրենք ամենալավը չեն, բայց իրենցից լավն էլ չկա, Արծվիկ Մինասյանը նշեց, որ այս իշխանությունները նման են երկու մուլտերի հերոսներին. «Մեկը, որ ասում է՝ я самый-самый ու թռնում ընկնում է, մյուսն էլ, որ ասում է՝ ո՞վ կա ինձնից ավելի գեղեցիկ: Երկուսն էլ հեքիաթներ են, բայց արդիական են այսօր: Ես չեմ ուզում, որ մեր իշանություններն այդ երկու հերոսների ճակատագրին արժանանան»:
