Այսօր shamshyan.com-ի թղթակցի հետ կապ հաստատեց Գոհար Անտոնյանը ու հայտնեց, որ եթե պատկան մարմինները համապատասխան օգնություն չցուցաբերեն, շաբաթ օրն իր ողջ ընտանիքը, այդ թվում նաև երեք ամսական թոռնիկը փողոցում կհայտնվեն: Պատմեց, որ Անտոնյանի մորաքույրը կեղծ նվիրատվություն է ձևակերպել Անտոնյանին պատկանող բնակարանը, ինչի պատճառով նրանք դիմել են փաստաբան Մամիկոն Մանուկյանին' դատական հայց ներկայացնելու ու դատարանում իրենց պաշտպանելու համար: Փաստաբան Մանուկյանը իր ծառայությունների համար տիկին Անտոնյանից պահանջել է 100 000 դրամ ու 2000 դոլար կաշառք՝ դատավորին: Գումարն ընթացքում սակարկվել ու դարձել էր 1300 դոլար: Անտոնյանների ընտանիքը մի կերպ հայթայթել էր պահանջված գումարը' դատը շահելու նպատակով, սակայն առաջին լսումով նրանք չեն շահել դատը, ինչպես խոստացել էր փաստաբանը: Այնուհետև փաստաբանը կրկին գումար է պահանջել ընտանիքից՝ այս անգամ արդեն 4000 դոլար, սակայն, ի վիճակի չլինելով վճարել գումարը, ընտանիքը հրաժարվել է փաստաբան Մանուկյանի ծառայություններից ու առանց փաստաբանի շահել դատն ու վերադարձրել տունը: Դատից հետո փաստաբանը սպառնացել է Անտոնյանի ընտանիքին, ու դատից 20 օր անց Անտոնյանների ընտանիքը դատարան ներկայանալու հայց է ստացել: Դատի ժամանակ նրանց ներկայացվել է կեղծ փաստաթուղթ, որ իբր Գոհար Անտոնյանը 2.000.000 դրամի պարտավորագիր է ստորագրել՝ փաստաբան Մամիկոն Մանուկյանին վճարելու համար: Անտոնյանի ընտանիքը, չկարողանալով ապացուցել, որ պայմանագիրը կեղծ է ու պաշտպանել իր շահերը դատարանում, դիմել է մեկ այլ փաստաբան Սամվել Մարտիրոսյանին, ով ստանձնել է դատը շահելու պատասխանատվությունը, սակայն չի ներկայացել դատավարություններից և ոչ մեկի ժամանակ: Այսպիսով, դատարանը որոշում է կայացրել պարտավորագիրը մարելու նպատակով վաճառքի հանել Անտոնյանների բնակարանն ու վճարել փաստաբան Մամիկոնյանի «պարտքը»: Հարկադիր կատարման ծառայության աշխատակիցները երկու օր ժամկետ են տվել Անտոնյանի ընտանիքին' բնակարանը լքելու համար ու հայտարարել, որ այն արդեն վաճառված է: Գոհար Անտոնյանը խնդրում է օգնել, որպեսզի ընտանիքը փաստաբանի վրեժի պատճառով փողոցում չհայտնվի: