Կառավարությունն այսօր բավական ուշագրավ մի որոշում է կայացրել: Պաշտպանության նախարարությանը թույլ է տվել մեկ նձից գնման ձեւով ձեռք բերել 3 500 տոննա դիզվառելիք: Իսկ տարօրինակն այն է, որ վառելիքը գնելու համար ՊՆ-ն դիմել է Հայաստանում անհայտ մի ընկերության' «ՌԱԻՆ ԲՈՈւ» անունով: Նշենք, որ կառավարության հաստատմանը ներկայացված որոշման նախագծում այս ընկերության մասին որեւէ այլ տեղեկատվություն չկա: «ՌԱԻՆ ԲՈՈւ» անունով որեւէ ընկերություն գրանցված չէ նաեւ ՀՀ կառավարության պետական ռեգիստրի գործակալությունում: Նման ընկերություն չկա նաեւ համացանցի որոնողական համակարգերի բազայում: Փաստորեն, կառավարությունը ՊՆ-ին թույլ է տվել գնման պայմանագիր կնքել մի ինչ-որ անհայտ ընկերության հետ, որն, ամենայն հավանականությամբ, ոչ միայն գրանցված չէ Հայաստանում, այլեւ իր գործունեությունն է ծավալում ՀՀ-ի սահմաններից դուրս: Իսկ ի՞նչն է պատճառը, որ կառավարությունը որոշել է գործարք կնքել մի այսպիսի կազմակերպության հետ: Պարզվում է' միմիայն առաջարկած ցածր գինը: Այս ընկերությունը 1 տոննա դիզելային վառելիքի համար սահմանել է 1120-1150 ԱՄՆ դոլար գնման արժեք: Ընդ որում, գնի մեջ ներառված է նաեւ վառելիքը Մեղրիի սահմանային անցակետ հասցնելու եւ մաքսազերծելու հետ կապված բոլոր ծախսերը: Իսկ թե ինչո՞ւ պաշտպանական գերատեսչությունը նախապատվությունը չի տվել որեւէ հայրենական կամ գոնե հայաստանյան շուկայում հայտնի ընկերության, մեկնաբանությունն առկա է հենց փաստաթղթում: «Գնանշման հարցում է կատարվել նաև այլ կազմակերպությունների, որոնց կողմից ներկայացվել են' «Ֆլեշ»ՍՊԸ' 1տ. 540 000-ից մինչև 550 000 ՀՀ դրամ, «Միկա Քորփորեյշն»ՓԲԸ' 1տ. 550 000-ից մինչև 560 000 ՀՀ դրամ, «Սի Փի Էս Օյլ Քորփորեյշն» ՍՊԸ' 1 տ. 541 176 ՀՀ դրամ»,- գրված է ՊՆ-ի ներկայացրած նախագծում: Փաստորեն, մեր կառավարությանն էլ են վախեցրել հայաստանյան վառելիքի շուկայում գործող ընկերությունների սահմանած գները: Հաշվի առնելով, որ «ՌԱԻՆ ԲՈՈւ»-ի 1 տոննա վառելիքի դիմաց սահմանած գինը 1120-1150 ԱՄՆ դոլար է, իսկ դոլարի գինը ներկայում շուրջ 410 դրամ է: Ստացվում է, որ այդ ընկերության սահմանած գինը ՀՀ դրամով կազմում է 459 200 - 471 500 դրամ: Այլ կերպ ասած' այս ընկերությունը հայաստանյան ընկերություններից շուրջ 100 000 դրամով նվազ գին է առաջարկել: Եվ եթե կառավարությունն իր ընդունած որոշմամբ անուղղակիորեն ընդունել է նաեւ այս փաստը, ապա առնվազն հաջորդ քայլով պետք է որ ուսումնասիրություն ձեռնարկի վառելիքի շուկայում գործող գների արդարացիության եւ հնարավոր չարաշահումների բացահայտման ուղղությամբ: