Երեկ ԼՂՀ Ազգային ժողովի նիստում անկախ պատգամավոր Վահան Բադասյանը պահանջել է արտգործնախարար Կարեն Միրզոյանի հրաժարականը: Մինչ այդ նախարարին հարց է ուղել ՀՅԴ պատգամավոր Արմեն Սարգսյանը: Նա ասել է, որ իր կուսակցությունը պատրաստվում էր պահանջել նախարարի հրաժարականը՝ Ֆրանս 24 ալիքին տված հարցազրույցից հետո, սակայն նախարարի եւ նախագահի մամուլի քարտուղարի բացատրություններից հետո որոշվել է ընդամենը զգուշացնել նախարարին:
Վահան Բադասյանը lragir.am-ին տված հարցազրույցում, սակայն, հայտնել է, որ չի կարելի ներել նման փաստերը, քանի որ դա ոչ թե վրիպում է, այլ դավաճանական քաղաքականության դրսեւորում: Նման արտաքին քաղաքականությունը Ղարաբաղին թելադրվում է Երեւանից եւ հանդիսանում է Սերժ Սարգսյանի՝ «Աղդամը մեր հայրենիքը չէ» թեզի շարունակությունը:
«Ճիշտ է, Արցախի նախագահ Բակո Սահակյանը մի քանի անգամ հայտարարել է, որ ԼՂՀ տարածքային ամբողջականությունը պաշտպանված է Սահմանադրությամբ, բայց Երեւանից թելադրված արտաքին քաղաքականությունը ուրիշ բան է ասում: Իսկ Հայաստանում իրականացվում է մի քաղաքականություն, որն արդեն բերել է Ռւոսաստանից երկրի լիակատար կախվածության», ասել է Վահան Բադասյանը:
«Պատերազմի ժամանակ ես կռվել եմ ոչ միայն Ղարաբաղի, այլեւ ամբողջ Հայաստանի անկախության եւ ինքնիշխանության համար, եւ հիմա ես ցավով հետեւում եմ, թե ինչպես է այդ անկախությունը մեկ առ մեկ փոխանցվում ռուսներին,- ասում է Վահան Բադասյանը: - Ռուսաստանին ենք տվել մեր էներգետիկան, ենթակառուցվածքները: Հիմա ուզում ենք փոխանցենք գազի խողովակները, որպեսզի գները մեզ միշտ Ռուսաստանը թելադրի: Այդ ամենը բերում է նրան, որ Ռուսաստանին է անցել նաեւ մեր քաղաքականությունը, ու հիմա մենք չենք կարողանում նույնիսկ բարձրաձայնել, որ Ռուսաստանը Ադրբեջանին զենք է վաճառում», ասում է պատգամավորը:
Մենք հայտնվել ենք խորը քաղաքական ճգնաժամի մեջ, կարծում է Վահան Բադասյանը, որը ներկայիս քաղաքականությունը կոչում է ազգային դավաճանություն: Ամեն ինչ տվել ենք Ռուսաստանին, միայն ծիրանն է մնացել, են էլ իշխանությունն է տնօրինում, ասում է նա: Որովհետեւ այսօր հայկական պետությունները ղեկավարում եմ մարդիկ, որոնք պատերազմի ժամանակ շտաբերում են եղել, ոչ թե նրանք, որ առաջին գծում են կռվել:
Վահան Բադասյանը գտնում է, որ եկել է պահը՝ պարզել մեր հարաբերությունները Ռուսաստանի հետ եւ վերականգնել ինքնիշխանությունը: Մենք ունենք Ռուսաստանի վրա ազդելու մի քանի լուրջ լծակ. նախ, ռազմական բազան, երկրորդ՝ ՀԱՊԿ անդամակցությունը, երրորդ՝ Ռուսաստանը լայնացրել է իր սահմաները մինչեւ Հայաստանի սահման, ի վերջո, մենք կարող ենք հարց դնել՝ արդյոք մենք այլեւս ռազմավարական գործընկերներ ենք: Այդ հարցերը շատ ցավոտ կլինեն Մոսվայի համար, բայց մենք գերադասում ենք ամեն ինչ տալ, միայն թե ռուսները չբարկանան, ասում է արցախյան պատգամավորը:
