Ո՞նց կարող է հանրապետության պարտքն ավելանալ 700 մլն դոլարով' առանց ԱԺ-ի իմացության։ Այս մասին այսօր ԱԺ հայտարարությունների ժամին ասաց ՀԱԿ խմբակցության անդամ Հրանտ Բագրատյանը՝ հավելելով, որ ինքն այս հարցում մեղադրում է ինչպես ՀՀ կառավարությանը՝ ՀՀ նախագահի գլխավորությամբ, այնպես էլ ԱԺ մեծամասնությանը։
«Հարգելի մեծամասնություն, մենք ընդդիմություն ենք, բայց մեզ միավորում է մի բան, խաղի կանոնները մեր և ձեր համար էլ մեկն են։ Դուք ձեզ համար սահմանելով խաղի կանոններ՝ վերացնում եք պառլամենտը։ Դուք խաղում եք մեր պետականության հետ, Դուք լրջագույն հարված եք հասցնում ՀՀ Սահմանադրությանը»,- ընդգծեց Հ․Բագրատյանը։
Նրա խոսքով՝ կառավարության պարզաբանումներն իր համար անընդունելի են։ «Ո՞նց կարող է հանրապետության պարտքը մեծանալ 700 մլն դոլարով և մենք տեղյակ չլինենք։ Ինչպե՞ս կարող եք խոսել կոռուպցիայից, երբ որդեգրել եք նման անթափանցիկ գործելաոճ»,- եզրափակեց ՀԱԿ պատգամավորը։
ԱԺ նախագահ Հովիկ Աբրահամյանն արձագանքելով՝ նշեց, որ Ինֆորմացիայի ազատության կենտրոնը, որպես ամենաանթափանցիկ կառույց, ճանաչել է ԱԺ-ն։ «Պարոն Բագրատյան, խնդրում եմ ինձ հետո կներկայացնեք, թե որտեղ է Ձեր նշած բացվածքը»,- ասաց Հ․Աբրահամյանն, ինչին ի պատասխան Հ․Բագրատյանը խոստացավ հենց այսօր փաստերով ներկայանալ Աժ նախագահին։