2013 թ.-ի հունիսին Հայաստանում «ԱրմՌոբոտիկս» առաջնության շրջանակներում Տեղեկատվական տեխնոլոգիաների ձեռնարկությունների միությունն անցկացրել է երկրում առաջին անօդաչու սարքերի մրցույթը, որին մասնակցել է հինգ թիմ։ Մրցույթի հաղթողներից մեկն արդեն ընկերություն է գրանցել, որն արտադրել է առաջին կոմերցիոն անօդաչու սարքը:
Այս մասին այսօր լրագրողների հետ հանդիպման ժամանակ ասաց Ինֆորմացիոն տեխնոլոգիաների ձեռնարկությունների միության գործադիր տնօրեն Կարեն Վարդանյանը։
Նա ասաց, որ իրենց ներկայացրած անօդաչու սարքերը հետաքրքրություն են առաջացրել Եվրոպայում, և Դանիայից արդեն պատվեր ունեն, և հիմա տվյալ ընկերությունը, որ Վարդանյանը չէր հիշում' ինչ անունով է գրանցվել, այս պահին սկսել է իր արտադրությունը' Դանիա արտահանելու համար: Վարդանյանի խոսքով' հայկական այդ ընկերությունը Դանիայի իր գործընկերների հետ պայմանագիր է կնքել' ամիսը 10 անօդաչու սարք վաճառելու համար:
Ըստ բանախոսի' այդ սարքերը կօգտագործվեն ագրոտնտեսական նպատակներով' վերևից դաշտերը նկարահանելու նպատակով:
«Սա Հայաստանի համար շատ մեծ քայլ է, որը թույլ կտա դուրս գալ անօդաչու սարքերի համաշխարհային շուկա և կդառնա առաջին քայլն այս ուղղության զարգացման նպատակով օտարերկրյա գործընկերների որոնման ճանապարհին», – ասաց Վարդանյանը' նշելով, որ Հայաստանում արտադրվող անօդաչու սարքերը կարող են կիրառվել պաշտպանական նպատակներով, ավտոմայրուղիների բնապատկերային տեսանկարահանման, մասնավորապես' խցանումներ և խախտումներ բացահայտելու նպատակով։
Mardik.am-ի հարցին, թե բացի Եվրոպայից, արդյոք Հայաստանում նույնպես կա ռեալ գործնական հետաքրքրություն այդ սարքերը ձեռքբերելու հարցում, Վարդանյանն ասաց, որ դեռևս չկա, բայց չի բացառվում, որ հետագայում լինի և Հայաստանում նույնպես կիրառվեն դրանք տարբեր նպատակներով:
