Հնդկաստանում նորածնի մարմինը հայտնաբերվել է հիվանդանոցի բժշկական թափոնները տեղափոխող բեռնատարի մեջ:
Երեխան մահացել է երկուշաբթի առավոտյան: Նրա ծնողները 1.500 ռուփի են վճարել Մաթա Չանան Դեվի մասնավոր հիվանդանոցի աշխատակիցներին՝ երեխայի մարմինը հիվանդանոցի դիարանում գիշերն պահելու համար:
Երբ ընտանիքի անդամները վերադարձել են երեխայի դիակը տանելու, այն այնտեղ չի եղել:
Նորածին աղջկա հորեղբայր Աշոկ Կումարն ասել է. «Երբ հիվանդանոցի աշխատակիցները տեսան, որ երեխայի դիակը տեղում չէ, նրանցից մեկը հանկարծ վազեց բժշկական աղբը հավաքող բեռնատարի ուղղությամբ: Նա նայեց աղբի մեջ և երեխայի մարմինը գտավ այնտեղ»:
Ըստ հիվանդանոցի գլխավոր բժիշկ Նիդհի Սարինի՝ դա շփոթմունք է: Նա խոստացել է ներքին հետաքննություն անցկացնել և պատժել մեղավորին:
Ըստ նախնական վարկածների՝ հիվանդանոցի աշխատակիցներից մեկը երեխայի մարմինը շփոթել է անդամահատված վերջույթի հետ և նետել աղբը: Երեխան գլխին ուռուցք ուներ, և բժիշկները խորհուրդ էին տվել նրա ծնողներին տանել նրան հիվանդանոց, որտեղ էլ երեխան մահացել է:
