Արխանգելսկի մարզի ոստիկանությունը փնտրում է երկու օրական երեխայի սպանության մեջ կասկածվող տղամարդուն և կնոջը: Այս մասին հաղորդում է «lifenews.ru»-ն: Օգոստոսի 20-ին Արխանգելսկի Սոլոմբալյան մարզում՝ Տերեխինի զբոսայգու գոտում, աղբարկղում, պայուսակում տեղավորված պոլիէթիլենային ծրարի մեջ, հայտնաբերվել է նորածին աղջկա մարմին՝ բռնի մահվան նշաններով: Փորձագետների տվյալներով՝ երեխային խեղդել են: «Հսկիչ տեսախցիկների և վկաների ցուցմունքների շնորհիվ՝ մեզ հաջողվեց կազմել կասկածյալների հանգամանալից ֆոտոդիմանկարները»,- ասել են ոստիկանությունում: Տեսախցիկները նկարահանել են, թե ինչպես են տղամարդն ու կինը փաթեթը աղբարկղի մեջ տեղավորում: Թեև դեպքը տեղի է ունեցել վաղ առավոտյան, բայց զգալի թվով վկաներ են ի հայտ եկել: Ոստիկանները պարզել են, որ այն կանայք, ովքեր գտնվում են իրավապահ մարմինների հսկողության տակ, կամ դեռ չեն ծննդաբերել, կամ էլ երեխաներ են ունեցել դեպքից շատ ավելի առաջ: Դրանից ելնելով՝ ոստիկանները եզրակացրել են, որ սպանված երեխայի մայրը պարզապես չի դիմել բժիշկների օգնությանը: Այժմ ոստիկանությունը հետախուզում է Արխանգելսկի և Նենեցական ինքնավար մարզերի տարածքները: Կասկածյալ զույգի դիմանկարները փոխանցվել են ողջ հյուսիսարևմտյան տարածաշրջանով: Ըստ ֆոտոռոբոտի՝ կինը 30-35 տարեկան է, ունի 170 սմ հասակ, մազերը մուգ գույնի են: Ոստիկանական տեղեկագրերը ներկայացնում են նաև տղամարդուն, ով, ըստ ամենայնի, մոտ 40 տարեկան է, ունի 175 սմ հասակ և բաց գույնի մազեր: Երկուսի պարագայում էլ մանրամասն ներկայացված են նաև նրանց հագուստները: