«Փրկենք Քեսաբը» կոչով Սիդնեյի թուրքական հյուպատոսարանի դիմաց կազմակերպված ցույցին մասնակցել են ավելի քան հազար հայ ակտիվիստներ: «Թուրքիան մեղավոր է, Թուրքիան պետք է վճարի», «1915. այլևս երբեք», «Ետ քաշե՛ք ձեր ձեռքերը Քեսաբից», «Ժողովրդավարություն, հա՜, հա՜», «Ամո՛թ, Թուրքիա՛, ամո՛թ» վանկարկումներով և ցուցապաստառներով ցուցարարները պահանջել են պատասխանատվության ենթարկել Թուրքի ային' իր տարածքից ծայրահեղ իսլամիստների մուտքը Սիրիա ապահովելու համար:
Ինչպես հաղորդում է «Արմենիա» շաբաթաթերթը, ավստրալահայ երիտասարդներին հատկապես բարկացրել էր, որ 1915 Հայոց ցեղասպանության հանցագործությունների համար դեռ իր պատիժը չկրած Թուրքիան կրկին հալածում է հայ խաղաղ բնակիչներին: «Դա պարզապես անընդունելի է: Այս դարաշրջանում մենք չենք կարող անգործ նստել, մինչ Թուրքիան առանց խղճի խայթի շարունակում է իր հալածանքները հայերի և այլ փոքրամասնությունների դեմ»,- նշել է ցույցը կազմակերպած Հ.Յ.Դ. Ավստրալիայի մասնաճյուղի նախագահ Արամ Թուֆենկյանը:
Ցույցը լայնորեն լուսաբանել են ավստրալական լրատվամիջոցները: Սոցցանցերում հայերին իրենց աջակցությունն են հայտնել Խորհրդարանի դաշնային անդամ և Ավստրալիայի պաշտպանության նախկին նախարար Ջոել Ֆիցգիբոնը և Նոր հրավային Ուելսի նահանգի օրենսդիր խորհրդի անդամ Ֆրեդ Նայլը:
Հայերի ցույցին ի պատասխան ցույցի էին դուրս եկել տեղական թուրքական համայնքի փոքրաթիվ անդամներ, ովքեր սուլոցներով փորձել են խանգարել հայկական ցույցը:
Մարտի 21-ին թուրք-սիրիական սահմանին գտնվող հայաշատ Քեսաբ քաղաքի վրա հարձակումը և գրավումը, որ հայկական սփյուռքին հիշեցնում են Օսմանյան կայսրության կողմից 1915-1923 թթ. քրիստոնյա ժողովուրդների, այդ թվում' հայերի ցեղասպանության մասին, դատապարտել են միջազգային կառույցներ, Ռուսաստանի ԱԳ նախարարությունը, ԱՄՆ պետքարտուղարությունը, աշխարհի տարբեր երկրներում գործող Հայ դատի հանձնախմբերը: Հայտնի մարդիկ իրենց կոչն են ուղղել միջազգային հանրությանը' ուշադրություն դարձնել սարսափելի դեպքերին: #SaveKessab հեշթեգը վերջին օրերին լ այնորեն տարածվել է սոցցանցերում' միջազգային հանրության ուշադրությունը հրավիրելով այդ ողբերգական իրադարձությունների վրա: Դժբախտաբար, հեշթեգը շահագործվել է նաև Քեսաբի իրադարձությունների մասին ապատեղեկատվություն տարածելու համար:
Սիրիայի պատմական քրիստոնեական հայկական շրջանը' Քեսաբը հարձակման է ենթարկվել: Թուրքիան թույլատրել է օտարերկրյա գրոհայիններին հատել իր սահմանն ու հարձակվել խաղաղ բնակչության վրա: Քեսաբահայությունը տարհանվել է սեփական ուժերով ու հաստատվել Լաթաքիայում: Զոհեր չեն եղել: Գրոհայինները գրավել են Քեսաբը, յուրացրել տեղի բնակչության ունեցվածքը, տներն ու եկեղեցին: Քեսաբահայությունը ցանկանում է վերառադնալ իր բնակավայրն ու շենացնել այն:
