Ադրբեջանի իշխանությունը լուրջ անհանգստացած է Արեւմուտքի դեմ Ռուսաստանի գործոնով շանտաժի քաղաքականության ձախողման պատճառով: Այս մասին, ինչպես հաղորդում է «Արմենպրես»-ը, հայտնում է «Ազադլըգ» թերթը' նշելով, որ մինչ վերջերս մարդու իրավունքների հետ կապված Արեւմուտքի կոչերին Ադրբեջանի իշխանութունը պատասխանում էր ավանդաբար' շանտաժի լեզվով, իսկ պաշտոնական եւ կառավարության վերհասկողության տակ գտնվող ԶԼՄ-ներն էլ շարունակաբար արշավ էին տանում ԱՄՆ-ի եւ Եվրոպայի դեմ:
«Ադրբեջանն Արեւմուտքին շանտաժ էր անում Ռուսաստանի գործոնով: Իշխանությունը կարծում էր, որ ինչպես նախկինում, այս անգամ եւս Արեւմուտքը տեղի կտա շանտաժի արշավին' չխորացնելով իշխանության հետ հարաբերությունների փչացումը, հաշվի կառնի Ռուսաստանի վտանգը եւ այլն: Սակայն, այս անգամ հակառակը տեղի ունեցավ: Սկզբունքայնություն ցուցադրելով դիրքորոշման մեջ, Արեւմուտքն ավելի խստացրեց մարդու իրավունքների, դեմոկրատական սկզբունքների հարցերում Ադրբեջանի իշխանություններին արվող կոչերը: Ադրբեջանի իշխանությունը հզոր հարված ստացավ, նույնիսկ, իրեն ա զատ եւ վստահ զգացող տեղում' Եվրոպայի Խորհրդի խորհրդարանական վերհաժողովում (ԵԽԽՎ): Դրա օրինակը կարող է լինել ԵԽԽՎ-ում երկրի ղեկավար Իլհամ Ալիեւի' տհաճ հարցերի հետ առնչվելու փաստը: Մինչ այժմ ոչ մի երկրի ղեկավարի դեմ նման վատ վերաբերմունք չէր ցուցաբերվել: Նույնիսկ կառավարության ներկայացուցիչներն են խոստովանում, որ ԵԽԽՎ-ում Իլհամ Ալիեւի դեմ ագրեսիա կար:
Բացի դրանից, Բաքվում ԵԱՀԿ ԽՎ-ի անցկացրած նստաշրջանում, չնայած իշխանության դիմակայությանը, Ադրբեջանի ժողովրդավարցման համար կարեւոր որոշումներ ընդունվեցին: Իշխանությունն այդ նստաշրջանում պարտություն կրեց այն առումով, որ երկրում գործող քաղաքացիական հասարակության ինստիտուտները պաշտպանություն գտան ԵԱՀԿ մակարդակով, կառույցը որոշեց վերականգնել Բաքվում իր գրասենյակի գործունեությունը, պահանջեց Անար Մամեդլիին ճանաչել որպես քաղբանտարկյալ եւ այլն: Բացի այդ, եվրոպացի պատգամավորները նստաշրջանում բարձրաձայնեցին Ադրբեջանում խոսքի եւ մամո ւլի ազատությունը խեղդելու, քաղաքական կուսակցություններին, իրավապաշտպաններին ճնշումների ենթարկելու մասին: Եթե նախկինում իխանությունն այդ ճնշումների դեմ կարողանում էր Արեւմուտքին հետ պահել Ռուսաստանին ռեվերանսներ անելու միջոցով, ապա այժմ արդեն դա եւս արդյունք չի տալիս: Քանի որ իշխանությունը հասկանում է, որ Ռուսաստանն ինքը եւս լուրջ ճնշումների առաջ է կանգնած: Այսպիսով, լուրջ անհանգստություն ապրող իշխանությունը հայտնվել է նաեւ անորոշության մեջ եւ դժվարանում է որոշել, թե ինչ պետք է անի Արեւմուտքի կողմից պահանջվող դեմոկրատական բարեփոխումները մերժելուց հետո», -գրում է «Ազադլըգ»-ը:
