ՀՀ մշակույթի նախարար Հասմիկ Պողոսյանն օրերս ընդունել է ԱՄՆ միջազգային զարգացման գրասենյակի (USAID) տնօրեն Քարեն Հիլիարդին, տնտեսական աճի գրասենյակի փոխտնօրեն Ջեֆ Փարետչանին և գրասենյակի ծրագրային մասնագետ Դիանա Ավետյանին: Ինչպես «Արմենպրես»-ին տեղեկացրին ՀՀ մշակույթի նախարարության հասարակայնության հետ կապերի բաժնից, հանդիպման ընթացքում Քարեն Հիլիարդը ներկայացրել է Հայաստանում իրենց կատարած աշխատանքները, նշել, որ հիմնականում աշխատում են տնտեսական զարգացման ուղղությամբ, որը ներառում է տեղեկատվական տեխնոլոգիաների ոլորտները' հավելելով, որ նախանշել են նաև հեռանկարային զարգացման ներուժ ունեցող ևս երկու ոլորտ՝ գյուղատնտեսություն և զբոսաշրջություն:
Այնուհետև գրասենյակի ղեկավարը տեղեկացրել է ԱՄՆ Միջազգային զարգացման գործակալության և Սմիթսոնյան հաստատության հետ փոխըմբռման հուշագրի կնքման մասին' հայտնելով, որ մշակում են համապարփակ հայեցակարգային փաստաթուղթ հետագա համագործակցության շրջանակներն ընդլայնելու համար, որը կներառի գրեթե բոլոր ոլորտները: Միևնույն ժամանակ հյուրերը ներկայացրել են Սմիթսոնյան ծրագրի հետ կապված մանրամասներ, որոնք ընդգրկում են ենթակառուցվածքների զարգացման, մշակութային ժառանգության պահպանության, նոր զբոսաշրջային արտադրանքի ձևավորման և այլ ոլորտներ: Ան դրադարձ է կատարվել նաև յուրաքանչյուր տարի ԱՄՆ-ում կազմակերպվող ֆոլկլորային փառատոնին, որը մեծ ազդեցություն է ունենում զբոսաշրջիկների հոսքի մեծացման վրա: Քարեն Հիլիարդը նշել է, որ բավականին մեծ հավանականություն կա, որ առաջիկա տարիներին նշված փառատոնի թեմատիկա ընտրվի Հայաստանը:
ՀՀ մշակույթի նախարար Հասմիկ Պողոսյանը շնորհակալություն է հայտնել կատարած աշխատանքի համար և առաջարկել ներկայացված ծրագիրը քննարկել առավել լայն լսարանով: Միևնույն ժամանակ նախարարը նշել է, որ ՀՀ կառավարության կողմից մշակվել են մի շարք ռազմավարական ծրագրեր, ինչպիսին է Երևան-Մեղրի զբոսաշրջային զարգացման հեռանկարային ծրագիրը, որն ընդգրկում է 3 մարզերի (ՀՀ Արարատի, Վայոց ձորի և Սյունիքի մարզեր) գրեթե բոլոր բաղադրիչները, սկսած երթուղու ճանապարհներին առկա հուշարձաններից վերջացրած ենթակառուցվածքների զարգացումը: Այդ ծրագիրը ներկայացվել է մի շարք դոնոր կազմակերպությունների, ինչպիսին է Համաշխարհային բանկը և անհրաժեշտության դեպքում կարող է օգտագործվել Սմիթոսոնյան ծրագրի նախապատրաստման և իրականացման փուլերում:
ՀՀ մշակույթի նախարարն անդրադարձել է մշակույթի նախարարության և ԱՄՆ դեսպանների մշակութային արժեքների պահպանության հիմնադրամի հետ հաջող համագործակցությանը: Հիշատակվել է Դաշտադեմի ամրոցի և նրա շրջակայքում գտնվող մշակութային ժառանգության, տարածքների ուսումնասիրման, գնահատման, վերականգնման, օգտագործման և հանրահռչակման (1-ին փուլ) ծրագիրը, որի իրականացումը համաֆինանսավորվում է ՀՀ կառավարության կողմից: Նախարարը կարևորել է նաև ծրագրի գնահատումը և առաջարկել է ձևավորել համատեղ աշխատանքային խումբ, որը կզբաղվի առաջացած հարցերի լուծմամ բ և տեղեկատվության փոխանակմամբ:
Հանդիպման ավարտին կողմերը պայմանավորվել են առավել հաճախակի հանդիպել՝ իրականացված աշխատանքների արդյունքներն ամփոփելու և ծրագրելու հետագա անելիքները:
