armsport.amՀայաստանի հավաքականի գլխավոր մարզիչ Բեռնար Շալանդը մամուլի ասուլիս տվեց Պորտուգալիայի Ֆարու քաղաքի հարեւանությամբ գտնվող «Ալգարվե» մարզադաշտում, որտեղ վաղը կկայանա «Եվրո-2016»-ի ընտրական փուլի Պորտուգալիա-Հայաստան հանդիպումը:
- Բազմաթիվ ֆուտբոլասերների հուզում է, թե ինչո՞ւ է հրավիրվել վնասվածք ունեցող Դավիթ Մանոյանը եւ չի հրավիրվել Արտակ Դաշյանը:
- Ըստ ՈւԵՖԱ-ի կանոնադրության 23 խաղացողներ կարող են լինել հայտացուցակում: Դավիթ Մանոյանն այս հավաքում 24-րդն է, վնասվածք ունի, հայտացուցակում չի լինելու, նա աշխատում է մեզ հետ: Մեզ հետ է, քանի որ լավ ֆիզոթերեւապեւտ ունենք:
Դաշյանի խաղից գոհ եմ, բայց թիմում կան Գեւորգ Ղազարյանը, Հենրիխ Մխիթարյանը… Մեր հարձակման գիծն առանց այդ էլ հագեցած է:
- Դուք նախորդ ասուլիսին հայտարարեցիք, թե Դենիս Թումասյանը կհրավիրվի, եթե ունենա խաղային պրակտիկա: Նա արդեն ունի խաղային պրակտիկա, սակայն չի հրավիրում: Այս հարցն արդեն մի քանի տարի քննարկման առարկա է: Ի վերջո, նա հավաքականի թեկնածու՞ է: Եթե այո, ապա ինչո՞ւ չի հրավիրվում…
- Նա թեկնածու է, բայց ես գոհ էի Սերբիայի հետ խաղում իմ պաշտպանական գծի խաղացողներից: Ինչ կլինի ապագայում, ապա չեմ կարող ասել:
- Ինչո՞վ կարող է զարմացնել Հայաստանը Պորտուգալիային:
- Ես երբեք իմ թիմին չեմ ասում, թե այսօր պետք է անպայման հաղթենք, կամ ոչ-ոքի խաղանք: Ես միշտ խաղը սկսում եմ 0:0 հաշվով: Գոհ կլինեմ, թե ոչ՝ կերեւա խաղից հետո: Սերբիայի հետ խաղից առաջ եթե ասեին, թե գոհ կլինեմ ոչ-ոքիից, ես կպատասխանեի՝ այո: Բայց այժմ ես դժգոհ եմ, որ այդ խաղում մեկ միավոր ենք վաստակել: Մենք մշտապես կարող ենք անակնկալներ մատուցել: Մենք ունենք լավ կատարողներ:
- Սերբիայի հետ խաղից հետո մեր հավաքականը հոգեբանորեն ինչպիսի՞ վիճակում է մոտենում առաջիկա խաղին:
- Կարծում եմ, որ խաղից հետո մի կողմից թիմը գոհ էր, որ նման խաղ ցույց տվեց, մյուս կողմից հիասթափված էր արդյունքից: Բայց մենք գիտակցում էինք, որ պետք է շարունակենք աշխատել, քանի որ առաջիկայում բարդ մրցակից է սպասվում: Մենք վաղը խաղալու ենք Եվրոպայի լավագույն հավաքականներից մեկի՝ Պորտուգալիայի դեմ եւ դա մեծ փորձություն է: Նման ուժեղ մրցակցի հետ խաղը խաղացողներին ավելի է մոտիվացնում: Կարելի է ասել, որ մենք պատրաստ ենք առաջիկա խաղին:
- Ի՞նչ կարող եք ասել Պորտուգալիայի նախորդ խաղերի մասին, որոնցում նրանք մրցել են Դանիայի եւ Ալբանիայի հետ:
- Լավ չի լինի, եթե ես խոսեմ Պորտուգալիայի խնդիրների մասին: Պորտուգալիան ունի մեծ փորձ, հիանալի կազմ… Այս թիմի հարձակումը շատ ուժեղ է: Միայն Ռոնալդուն չէ, որ ուժեղ է դարձնում հարձակման գիծը: Կա նաեւ Նանի, ով շատ ուժեղ է: Պորտուգալիան թիմ է, որն ունի անհատապես շատ ուժեղ խաղացողներ: Բոլոր օղակներում էլ Պորտուգալիան լավ կադրեր ունի:
Ինչ վերաբերվում է ընտրական խաղերին, ապա դժվար է համեմատություններ անել, քանի որ այդ ընթացքում մարզիչը փոխվեց եւ ասպարեզում էր լրիվ տարբեր թիմեր: Բացի այդ, առանց Ռոնալդուի Պորտուգալիան լրիվ այլ թիմ է եւ դժվար է խոսել Ալբանիայի հետ խաղի մասին:
- Բավական երկար ժամանակ Յուրա Մովսիսյանը վնասվածք ուներ: Վերջերս նա վերադարձավ «Սպարտակի» հիմնական կազմ: Ինչպե՞ս եք գնահատում նրա մարզավիճակը: Արդյո՞ք նրան կտեսնենք մեկնարկային կազմում:
- Եթե նա խաղում է «Սպարտակում», ապա նշանակում է, որ նա ի վիճակի է խաղալ: Ես «Սպարտակի» գլխավոր մարզիչ Մուրադ Յակինի հետ լավ հարաբերությունների մեջ եմ եւ խոսել եմ Մովսիսյանի վերաբերյալ:
