Ավստրալիայի խորհրդարանը հավանություն է տվել միգրացիոն օրենսդրության մեջ փոփոխություններ և լրացումներ կատարելու շուրջ, որը ենթադրում է փախստականներին ժամանակավոր վիզաների տրամադրում: Այս մասին հայտնել է BBC-ի ռուսական ծառայությունը:
Այդ քայլն ուղղված է հազարավոր փախստականների խնդրի լուծմանը, որոնք այժմ պահվում են Պապուա Նոր Գվինեայում և Նաուրուում անօրինական ներգաղթյալների համար հատուկ կենտրոններում:
Փոփոխությունների համաձայն՝ փախստականները երեքից մինչև հինգ տարի ժամկետով վիզա ստանալու դեպքում իրավունք կունենան ապրել և աշխատել Ավստրալիայում:
Եթե փախստականի կարգավիճակ ստանալու թեկնածուները վիզա ստանալու դիմում չներկայացնեն, Ավստրալիայի իշխանությունները նրանց կարող են արտաքսել:
2012 թվականի օգոստոսից Ավստրալիա է գնացել 30 հազարից մարդ, ով խնդրել է ապաստան տրամադրել իրեն:
Փախստականի կարգավիճակ ստանալու համար ներգաղթյալներն Ավստրալիա են գնում անօրինական ճանապարհով, հիմնականում՝ ծովով: Հաճախ են դեպքերը, երբ ներգաղթյալների տեղափոխող նավերը նավաբեկության են ենթարկվում ավստրալական ափերի մոտ:
