ՀՀ կառավարությունում ստեղծվել է հանձնաժողով, որը հաշվարկում է այս տարեսկզբին հակառակորդի կողմից սահմանամերձ համայնքների ուղղությամբ արձակված կրակոցների վնասները՝ դրանք փոխհատուցելու նպատակով: Այդ մասին ՀՀ կառավարության նիստում հայտարարեց ՀՀ վարչապետ Հովիկ Աբրահամյանը:

 

 

«Մենք շատ ուշադիր ենք և այսուհետ ևս ուշադիր ենք լինելու բոլոր սահմանամերձ համայնքների ազգաբնակչության հոգսերի նկատմամբ»,- «Արմենպրես»-ի փոխանցմամբ՝ ասաց վարչապետը:Ի դեպ, կառավարությունը հաստատեց մարտական գործողությունների հետևանքով չօգտագործվող հողատարածքներ ունեցող այն սահմանամերձ գյուղական համայնքների ցանկը, որտեղ իրականացվող գործունեությունն ազատվում է հարկերից:

 

Ցանկում ընդգրկվել են Արարատի մարզի Երասխ, Վայոց Ձորի Խաչիկ, Խնձորուտ, Սերս, Նոր Ազնաբերդ, Բարձրունի,Գեղարքունիքի Վահան և Տավուշի մարզի Ներքին Կարմիր աղբյուր, Ոսկեվան, Չորաթան, Կողբ, Վազաշեն, Բերքաբեր, Չինարի, Արծվաբերդ, Ծաղկավան (Իջևանի շրջան), Մոսեսգեղ,Դովեղ, Պառավաքար, Բերդավան, Բարեկամավան, Կոթի, Բաղանիս, Սարիգյուղ, Այգեձոր, Կիրանց, Այգեպար, Սևքար, Այգեհովիտ, Ոսկեպար և Վերին Կարմիր աղբյուր համայնքները:

 

Նախագծի նպա­տակը «Սահ­մա­նամերձ գյուղական համայնքներում իրականացվող գործու­նեությունը հարկերից ազա­տելու մասին» ՀՀ օրենքի կիրարկումն ապահովելն է: Հովիկ Աբրահամյանը կարևորեց որոշման ընդունումը և ընդգծեց, որ այն մեծ աջակցություն է սահմանամերձ համայնքներին:

 

2015 թվա­­­­կանի հունվարի 1-ից ուժի մեջ է մտել «Սահմանամերձ գյուղական համայնքներում իրա­­կանացվող գործու­նեությունը հարկերից ազատելու մասին» ՀՀ օրենքը, որի համա­ձայն ՀՀ կառա­վա­րու­­թյան կողմից հաստատված ցանկում ներառված՝ մարտական գործողությունների հետևանքով չօգտագործվող հողատարածքներ ունե­ցող սահ­մանամերձ գյու­ղա­­կան համայնք­նե­րում իրա­կա­նացվող գործունեու­թյունն ազատվում է հար­­կե­րից:

 

Միաժամանակ, վերը նշված համայնքների բնակիչները կօգտվեն նաև ՀՀ կառավարության տարբեր արտոնություններից, մասնավորապես, նրանք կազատվեն հողի հարկից և ոռոգման ջրի վարձից և կվճարեն օգտագործած գազի ու էլեկտրաէներգիայի վարձի միայն կեսը: