Սոցիալ Դեմոկրատ Հնչակյան կուսակցության Հայաստանի վարչությունը ցավակցություն է հայտնել գյումրեցի Սերյոժա Ավետիսյանի մահվան կապակցությամբ և հույս հայտնել, որ սպանության մեջ մեղադրվողը կդատվի ՀՀ դատական համակարգի կողմից: «Արմենպրես»-ի հաղորդմամբ՝ այս մասին նշված է ՍԴՀԿ Հայաստանի վարչության մամուլի ծառայության տարածած հաղորդագրութ յան մեջ, որում ասված է.
«Սոցիալ Դեմոկրատ Հնչակյան կուսակցության Հայաստանի վարչությունը խոր կսկիծով տեղեկացավ փոքրիկ Սերյոժա Ավետիսյանի մահվան մասին: Գյումրիում տեղի ունեցած սպանդն իր դաժանությամբ և անմարդկայնությամբ աննախադեպ էր: Մենք բոլորս հույս ունեինք, որ Սերյոժան կդիմագրավի ստացած վերքերին, սակայն, ավաղ, փոքրիկի ճակատագիրն այլ կերպ ստացվեց:
Մենք խորապես սգում ենք Ավետիսյան ընտանիքի մահն ու միանշանակ արդարացված ենք համարում այս օրերին հասարակության շրջանում տիրող զայրույթի և վրդովմունքի ալիքը:
Ս.Դ. Հնչակյան կուսակցության Հայաստանի վարչությունը համոզված է, որ Ավետիսյանների սպանության մեջ մեղադրվող ոճրագործը պետք է դատվի Հայաստանի Հանրապետության դատական համակարգի կողմից և իր պատիժը կրի ՀՀ քրեակատարողական հիմնարկում:
Մենք ակնկալում ենք բաց և թափանցիկ դատական քննություն և դատական գործընթաց՝ ստանալու բոլոր այն հարցերի պատասխանը, որ այսօր հուզում է ցանկացած բանական մարդու»:
