Ռումինիայում ՀՀ դեսպան Համլետ Գասպարյանը հանդիպում է ունեցել Ռումինիայի մշակույթի նախարար Իոան Վուլպեսկուի հետ: Հանդիպմանը երկուստեք գոհունակություն է հայտնվել «Մշակույթի, կրթության և գիտության բնագավառներում համագործակցության մասին» 2011-2015թթ. միջպետական ծրագրի շրջանակներում իրականացվող մշակութային փոխգործակցության դրական դինամիկայի կապակցությամբ և ընդգծվել համաձայնագրի երկարաձգման անհրաժեշտությունը հաջորդ փուլի համար:
Ինչպես «Արմենպրես»-ին տեղեկացրին ՀՀ արտաքին գործերի նախարարության մամուլի ծառայությունից, քննարկվել են համատեղ մշակութային ժառանգությանը, մասնավորապես դրա ուսումնասիրման, պահպանության և ներկայացմանն առնչվող հարցեր: Այս համատեքստում վերջնական համաձայնություն է ձեռք բերվել Ռումինիայի պատմության ազգային թանգարանում ռումինահայ մշակութային ժառանգությանը նվիրված «Արարատից Կարպատներ» ցուցահանդեսի կազմակերպման շուրջ, որի վերաբերյալ կողմերի միջև հուշագիր էր ստորագրվել դեռեւս 2014թ. ապրիլին:
Դեսպան Գասպարյանը ներկայացրել է 2015թ. նախանշված մշակութային միջոցառումները, որոնց թվում' մարտի 26-ին «Գյուրջիև» անսամբլի համերգը Բուխարեստում, ապրիլի 21-ին Հայոց ցեղասպանությանը նվիրված համաշխարհային ընթերցման կազմակերպումը Բուխարեստում և Ռումինիայի տարբեր քաղաքներում, ապրիլի 23-ին Բուխարեստի Ռադիոյի տան համերգասրահում Կոմիտասին նվիրված հայ-ռումինական հիշատակի համերգը' ռումին ժողովրդական երգի վարպետ Գրիգորե Լեշեի և կոմիտասագետ Արթուր Շահնազարյանի մասնակցությամբ, ապրիլի 24-ին Ռումինիայի Շինականի ազգային թանգարանում «Հայոց հետքերով.
Արարատից Հայկական փողոց», իսկ մայիսի 16-ին Ռումինիայի հին քարտեզների և գրքերի թանգարանում «Հայաստանի պատմությունը քարտեզներով» ցուցահանդեսները: Հոկտեմբերին Ռումինական ակադեմիայում տեղի կունենան նշանավոր հայագետ և արևելագետ, Ռումինական ակադեմիայի հետմահու անդամ Հակոբ Սիրունու 125-ամյակի հոբելյանական միջոցառումները: Նախատեսված են նաև Բուխարեստի, Դումբրավենի, Գերլայի և Գեորգենի ամենամյա հայկական մշակութային փառատոները:
