Շտապ բուժօգնության մեքենայով կտրող-ծակող վերքով «Գյումրի» բժշկական կենտրոն է տեղափոխվել հիմնադիր խորհրդարանի անդամ Հրաչիկ Վանոյի Միրզոյանը: Ինչպես «Արմենպրես»-ին տեղեկացրին «Գյումրի» բժշկական կենտրոնց, ուր տեղափոխվել է Հրաչիկ Միրզոյանը, այս պահին տուժածն արդեն անցել է բուժզննում:
Ինչպես տեղեկացնում են հիվանդանոցի մամուլի ծառայությունից, տուժածի վիճակն այս պահին գնահատվում է միջին ծանրության: Վերջինս ունի ներքին արյունահոսություն որովայնի խոռոչում: Պատրաստվում է վիրահատություն: Նշենք, որ 1954 թվականին ծնված Երևան Վարդաշեն 4-րդ թաղամաս 23/10 հասցեի բնակիչ Հրաչիկ Միրզոյանը կրծքավանդակի ձախ կեսի կտրող-ծակող վերքով կենտրոն էր տեղափոխվել 17:15-ին:
Դեպքը տեղի է ունեցել Գյումրու Թատերական հրապարակում, որտեղ հանրահավաք էր հրավիրել Հիմնադիր խորհրդարանը: Ելույթով են հանդես եկել ՀԽ անդամները: Սակայն որոշ ժամանակ անց Թատերական հրապարակում սկսվել է իրարանցում. տարբեր ուղղություններից սկսել են ձվեր շպրտել հանրահավաքի մասնակիցների եւ ՀԽ անդամների ուղղությամբ: Այս ընթացքում էլ ականտեսների վկայությամբ տեղի էր ունեցել դանակահարությունը:
