Աշխարհն այս պահին շատ բազմազան է, այսինքն՝ գոյություն ունի մի քանի «աշխարհ»: Այս մասին այսօր Բաղրամյան պողոտայում 1in.am-ի ուղիղ եթերում ասաց Տեղեկատվական անվտանգության փորձագետ Սամվել Մարտիրոսյանը և նշեց, թե որոնք են այդ «աշխարհները»:
«Կա Ադրբեջանը՝ որպես առանձին մի մոլորակ, որն ապրում է իր կյանքով: Իրենք առաջին հերթին նեղացած են մեզանից, որ մենք իրենց օլիմպիադայից ուշադրությունը շեղել ենք. հիմա ոչ ոք չի հետաքրքրվում Ադրբեջանում անցկացվող օլիմպիական խաղերով: Զուգահեռ տարածում են, որ Հայաստանն անդունդի եզրին է, տեսե՛ք, արդեն ընկնում է, ինչ լավ է Բաքվում, ինչ վատ՝ Հայաստանում»,- ասաց Մարտիրոսյանը:
Այնուհետև փորձագետն առանձնացրեց նաև ուկրաինական «մոլորակը», որտեղ այս ամենը ներկայացնում են, որ այստեղ կատարվում է այն, ինչ Ուկրաինայում է: Հայերի մասին այնտեղ արդեն բանաստեղծություններ են գրում:
Մեկ այլ հատված էլ Մարտիրոսյանն առանձնացրեց ռուսաստանյանը, որտեղ շատ լուրջ համարում են, թե ինձ մի էկլեր հյուրասիրեցին, որ այդ էկլերը Պետդեպարտամենտն է ֆինանսավորել, որ գամ այստեղ ուտեմ, ձեզ էլ փող են տվել, որ գաք, նկարեք, թե ինչպես եմ ես այդ էկլերն ուտում: «Եվ ընդհանրապես, կարծում են, որ այս ամենն արվում է Ռուսաստանի դեմ և Հայաստանն էլ շուտով կործանվելու է, թուրքերը գալու են մորթեն, որովհետև ռուսները նեղանալու են ու գնան»,- նկատեց փորձագետը:
