wrestling.am  Ազատ ոճի ըմբշամարտի Հայաստանի մեծահասակների հավաքականը հունվարի 31-ից փետրվարի 12-ը ուսումնամարզական հավաք կանցկացնի Կիևի մերձակայքում գտնվող Կոնչա-զասպա առողջարանային բնակավայրում, որտեղ է գտնվում Կիևի հանրահայտ «Դինամո» ֆուտբոլային ակումբի մարզաբազան: Ինչպես տեղեկացրեց հավաքականի գլխավոր մարզիչ Արայիկ Բաղդադյանը, հավաքից անմիջապես հետո մեր ըմբիշները հանդես կգան փետրվարի 12-14-ը Ուկրաինայի մայրաքաղաքում տեղի ունենալիք խոշոր միջազգային մրցաշարի: Ուսումնամարզական հավաքին և միջազգային մրցաշարին կմասնակցի 14 ըմբիշ. Գարիկ Բարսեղյան, Գառնիկ Մնացականյան (57 կգ), Վոլոդյա Ֆրանգուլյան (61 կգ), Դավիթ Սաֆարյան (65 կգ), Վալտեր Մարգարյան (70 կգ), Գրիգոր Գրիգորյան, Վարուժան Կաջոյան (74 կգ), Մուսա Մուրթազալիև, Շամիր Աթյան, Հաջիմուրադ Նուրմոգամեդով, Սարգիս Հովսեփյան (86), Էդգար Ենոքյան, Անդրանիկ Գալստյան (97 կգ), Լևոն Բերիանիձե (125 կգ): Բաղդադյանին հավաքի ընթացքում կօգնեն հավաքականի մարզիչներ Հովսեփ Հովսեփյանն ու Հաբեթնակ Կուրղինյանը, ինչպես նաև թիմի բժիշկը: Մրցաշարի ժամանակ թիմին կմիանա միջազգային կարգի մրցավար Սամվել Հարությունյանը: Տեղեկացնենք նաև, որ ըստ Բաղդադյանի, Կիևում գրեթե հարյուր տոկոսով կորոշվի մարտի 8-13-ը Ռիգայում Կայանալիք Եվրոպայի առաջնության մեր ընտրանու կազմը: Այս մասին տեղեկացնում է ըմբշամարտի ֆեդերացիայի պաշտոնական կայքը: