«Յոնջլախցի Նորո»-ին դատարանը կալանավորեց. նա տեղափոխվեց Նուբարաշենի բանտ (տեսանյութ)

12:30 - 3.Դեկտեմբեր.2016

Երեկ՝ դեկտեմբերի 2-ին, Հայաստանի քննչական կոմիտեի Երևան քաղաքի քննչական վարչության Մալաթիա-Սեբաստիա վարչական շրջանի քննչական բաժնի ավագ քննիչ Արտյոմ Շոխոյանը միջնորդություն է ներկայացրել Մալաթիա-Սեբաստիա վարչական շրջանների ընդհանուր իրավասության դատարան, որպեսզի դատարանը՝ որպես խափանման միջոց, երկամսյա կալանքի որոշում կայացնի «Յոնջլախցի Նորո» մականվամբ Երևանի բնակիչ, 45-ամյա Նորայր Ղազարյանի նկատմամբ։

Ֆոտոլրագրող Գագիկ Շամշյանի տեղեկացմամբ՝ դատավոր Մխիթար Պապոյանը դռնփակ դատական նիստն անցկացնելուց և խորհրդակցական սենյակից վերադառնալով՝ որոշեց բավարարել քննիչի միջնորդությունը և Յոնջլախցի Նորոն, ով կասկածվում է ապօրինի զենք կրելու և սպանություն կատարելու մեջ, կալանավորվեց։

Նրան դատարանից տեղափոխեցին Նուբարաշենի բանտ։ Ինչպես ավելի վաղ հայտնել էր ֆոտոլրագրողը, նոյեմբերի 30-ին Հայաստանի քննչական կոմիտեի Երևանի քննչական վարչության Մալաթիա-Սեբաստիա վարչական շրջանի քննչական բաժնի պետի պաշտոնակատար Արսեն Վարդանյանի կողմից ստեղծված քննչական խմբի անդամ, ավագ քննիչ Արտյոմ Շոխոյանի որոշմամբ ձերբակալվել էր Երևան քաղաքի բնակիչ, 45-ամյա Նորայր Ղազարյանը:

Վերջինս նախկինում մի քանի անգամ դատված է եղել և քրեական աշխարհում հայտնի է «Յոնջլախցի Նորո» մականվամբ: Ֆոտոլրագրողը հայտնել էր, որ վերջինս կասկածվում էր այս տարվա սեպտեմբերի 2-ին, ժամը 21:30-ի սահմաններում Արագածոտնի մարզի Թթու Ջուր գյուղի բնակիչ, 29-ամյա Վահե Գևորգյանին մի խումբ անձանց հետ սպանելու մեջ:

Նշված քրեական գործի շրջանակում կալանավորվել էր Երևան քաղաքի Ավան վարչական շրջանի Խուդյակով փողոցի 19 տան բնակիչ Արտակ Հայրապետյանը, ով նույնպես կասկածվում էր Վ. Գևորգյանի սպանությանը մասնակցություն ունենալու մեջ:

Յոնջլախցի Նորոյին սպանության հաջորդ օրը Մալաթիայի ոստիկանները տեղափոխել էին ոստիկանություն, սակայն հետո ազատ էին արձակել, մինչդեռ եղել էին փաստեր, որ նա ոչ միայն մասնակից էր եղել սպանությանը, այլև հրահրել էր:

Ոստիկանները բավարարվելով Ա. Հայրապետյանի կցկտուր խոստովանական ցուցմունքներով՝ Յոնջլախցուն ազատ էին արձակել:

Մալաթիայի քննիչները հսկայածավալ քննչական գործողություններ էին կատարել և ձեռք բերել նոր ապացույցներ, այդ թվում՝ փորձագետի եզրակացություն, որից հետո քննիչը որոշում էր կայացրել Յոնջլախցի Նորոյին որպես վկա հրավիրել քննչական բաժին: