Այսօր՝ սեպտեմբերի 30-ին, Մյասնիկյան պողոտայի մի խումբ բնակիչներ հավաքվել էին «Բելաջիո» ռեստորանի մոտակայքում և սպառնում էին փակել պողոտան, եթե քաղաքային իշխանությունները վերգետնյա անցում կառուցելու խոստումը չկատարեն կարճ ժամանակի ընթացքում:

Ինչպես հայտնում է աղբյուրը, շուրջ 145 տան բնակիչ ստիպված է ամեն օր, այն էլ մի քանի անգամ, կանգառ գնալու կամ այնտեղից տուն վերադառնալու համար չթույլատրված տեղով վտանգավոր ճանապարհը վախը սրտում հատել:

SHAMSHYAN.com-ի թղթակցի հետ զրույցում բնակիչներն ասում էին, որ Մյասնիկյան պողոտայի այդ հատվածում բավականին շատ են վրաերթի դեպքերը ու հիմնականում՝ մահվան ելքով: Արդեն 12 տարի դիմում են տարբեր պատկան մարմիններին, սակայն մերժում են ստանում՝ պատճառաբանությամբ, որ քաղաքային բյուջեում փող չկա և հարցը ընդգրկված է առաջիկա տարիների անելիքների մեջ:

Հուսահատ բնակիչները խոստացան, որ եթե այս կերպ էլ իրենց հարցի շուրջ ոչ մի դրական տեղաշարժ չնկատվեց, կդիմեն ծայրահեղ քայլի և արդեն հոկտեմեբերի 1-ին կփակեն արագընթաց պողոտան:

Աղբյուրը՝ shamshyan.com