Երևան-Սևան ավտոճանապարհին Քաղսի գյուղի մոտակայքում ճանապարհատրանսպորտային պատահար է գրանցվել:

Ինչպես «Արմենպրես»-ին տեղեկացրին արտակարգ իրավիճակների նախարարությունից, դեպքի վայր է մեկնել մեկ մարտական հաշվարկ:

Պարզվել է, որ Մ4 ավտոճանապարհի Երևան-Սևան հատվածի 37-րդ կմ-ին Toyota ipsum մակնիշի RU 545 CO պետհամարանիշի (վարորդ՝ 1986 թ. ծնված Ս. Չ.) ավտոմեքենան դուրս է եկել ճանապարհի երթևեկելի հատվածից, բախվել ճանապարհի բաժանարար հատվածում գտնվող գովազդային վահանակի սյանը և բռնկվել: Վարորդը տեղում մահացել է:

Հրդեհը մեկուսացվել է ժամը 08:48-ին, մարվել՝ 09:00-ին: Ամբողջությամբ այրվել է Toyota ipsum մակնիշի RU 545 CO պետհամարանիշի ավտոմեքենան:

Փրկարարները վարորդի դին դուրս են բերել մեքենայից և մոտեցրել շտապօգնության ավտոմեքենային, իսկ հատուկ տեխնիկայի օգնությամբ ավտոմեքենան տեղափոխել՝ ավտոքարշակի վրա: