Երևանում շարունակվում է նոյեմբերի 1-ին մեկնարկած աշնանային էտը: Մայրաքաղաքի փողոցների, այգիների, պուրակների, բակերի և հանրային օգտագործման այլ տարածքների ծառերից հեռացվում են չոր և հիվանդ, ինչպես նաև գերաճած ճյուղերը: Աշնանային էտն ապահովում է ծառերի դեկորատիվ տեսքը, ինչպես նաև զերծ պահում դրանց հիվանդություններից և կանխում հնարավոր վթարային իրավիճակները: Խոր էտ կիրառվում է բացառապես բարդիների և այն ծառերի նկատմամբ, որոնք ենթակա են քամիներից տապալվելու վտանգին: Այս մասին «Արմենպրես»-ին տեղեկացրին Երևանի քաղաքապետարանի տեղեկատվության և հասարակայնության հետ կապերի վարչությունից:
Ծառերի աշնանային էտին համընթաց շարունակվում է նաև ծաղիկների՝ ջերմոցներ տեղափոխելու գործընթացը, իսկ մայրաքաղաքի համապատասխան հատվածները նախապատրաստվում են կակաչների նոր սոխուկների տնկման համար: Մասնավորապես, նախատեսվում է տնկել Հոլանդիայից բերված շուրջ 750 000 կակաչի սոխուկ:
Երևանը միաժամանակ պատրաստվում է ծառատունկին: Համապատասխան վայրերում փորվում են փոսեր, նախապատրաստվում են տնկիներ: Ծառատունկի ժամանակ Երևանում տնկվելու է շուրջ 15 000 տարբեր տեսակի ծառ: Շաբաթօրյակ-ծառատունկը տեղի կունենա նոյեմբերի 11-ին:
Բարձր որակ ապահովելու նպատակով բոլոր աշխատանքները վերահսկվում են Երևան քաղաքապետարանի բնապահպանության վարչության և վարչական շրջանների աշխատակազմերի կողմից, ներգրավված են նաև ոլորտի մասնագետներ:
