![](http://mediamall.am/timthumb.php?src=upload/182483.png&w=300&h=200&mt=1515411726)
«Աջ ղեկ» նախաձեռնության անդամներն այս պահին Կառավարության դիմաց բողոքի ցույց են սկսել՝ ընդդեմ աջ ղեկով ավտոմեքենաներ ներկրելու որոշման: Նախաձեռնության անդամները հանդիպում են պահանջում վարչապետ Կարեն Կարապետյանի հետ, քանի որ ըստ նրանց ՀՀ տրանսպորտի, կապի և տեղեկատվական տեխնոլոգիաների նախարար Վահան Մարտիրոսյանի հետ հանդիպումը ոչ մի արդյունք չի տվել և իրենք որոշել են շարունակել պայքարը:
Ավտոերթի մասնակիցները պահանջում են չեղարկել աջ ղեկով մեքենաների ներմուծումն արգելող օրենքը:
Նշենք, որ ակցիայի մասնակիցների հետ հանդիպման էր դուրս եկել Տրանսպորտի, կապի և տեղեկատվական տեխնոլոգիաների նախարարության ներկայացուցիչը, ով տեղեկացրեց, որ ապրիլի 1-ից կարգելվի աջ ղեկով մեքենաների ներմուծումն ու գրանցումը, իսկ գործող սեփականատերերը դրանք կարող են ազատ շահագործել, հաշվառել և վերահաշվառել:
Սակայն նախաձեռնության անդամները նշեցին, որ շարունակելու են բողոքի ակցիան: Նրանցից մեկը նկատեց, որ ԵՏՄ անդամակցությունից հետո, այսպես թե այնպես, որոշում է ընդունվել, որ երրորդ երկրներից ներմուծվող մեքենաների թիվը սահմանափակվում է. «Սա նշանակում է, որ ժամանակավրեպ նախաձեռնություն է մշակվել և ներկայացվել, որը սոցիալական խնդրի առաջ է կանգնեցնում մի ստվար զանգվածի»,- նշեց նա:
Հիշեցնենք՝ ՀՀ տրանսպորտի, կապի և տեղեկատվական տեխնոլոգիաների նախարարությունը ներկայացրել է մի նախագիծ, որով առաջարկում է փոփոխություն կատարել «Ճանապարհային երթևեկության անվտանգության ապահովման մասին» օրենքում: Սա հիմնավորվում է աջակողմյան ղեկով մեքենաների շահագործման՝ տեխնիկապես վտանգավոր լինելով: Ըստ այդմ՝ առաջարկվում է 2018 թվականի ապրիլի 1-ից արգելել աջ ղեկով մեքենաների ներմուծումը:
![](http://lurer.com/disc/08-01-18/f23f34fb3b1d9d9b4e3fe59a461a982c.jpg)
![](http://lurer.com/disc/08-01-18/2a45d8bb4805144c68e865410aa54476.jpg)
![](http://lurer.com/disc/08-01-18/7ade679f20c4a1a92a0f208159b3eb96.jpg)
![](http://lurer.com/disc/08-01-18/061aa299ba7c92169b471d663ba2f20f.jpg)
![](http://lurer.com/disc/08-01-18/f55b177995d2568e1e1f294b1109ecd7.jpg)