Ապրիլի 21-ին Նիկոլ Փաշինյանն ու ընդդիմադիրները իրենց բողոքի գործողությունները սկսեցին Նոր Նորքի 7-րդ զանգվածից:
17:30
Այս պահին Հանրապետության հրապարակը լեփ-լեցուն է ցուցարարներով: Նիկոլ Փաշինյանն ու իր կողմնակիցները քայլերթով հասան այնտեղ: Կան մեծ թվով ոստիկաններ, իրավիճակը այս պահին հանդարտ է:
15:48
Այս պահին իրավիճակը լարված է Մաշտոցի պողոտա-Պուշկին փողոցի խաչմերուկում: Ցուցարարները կաթվածահար են արել երթևեկությունը, ժամանում են ոստիկանական նոր ուժեր:
13.30
Ցուցարարներին միացավ երգիչ Ռուբեն Հախվերդյանը: Ըստ նրա, կառավարությունը պետք է հրաժարական տա:
13.26
Ցուցարարներն այս պահին Սայաթ Նովա պողոտայում են:
13.00
Երեւանում ցուցարարները քիչ առաջ փակել են Մաշտոցի պողոտա-Ամիրյան փողոցի խաչմերուկը:
Ցուցարարները կանգնել են մեքենաների դիմաց եւ հորդորում են միանալ իրենց: Բողոքի այս ակցիան հսկում են մեծ թվով ոստիկաններ:
12:48- Նիկոլ Փաշինյանը խոսելով Սերժ Սարգսյանի երկխոսություն սկսելու մասին, ասաց.
«Պատրաստ ենք քննարկել միայն իր հեռացման պայմանները: Սա երկխոսություն չէ: Ես երեկ ասեցի, որ մենք վենդետաներ չենք ուզում, վրեժխնդրություն չենք ուզում: Մենք ուզում ենք, որ իշխանության փոխանցումը ժողովդին լինի անցնցում»:
12.35
Նիկոլ Փաշինյանն անդրադառնալով իրեն ձերբակալելու հարցին ասաց.
«Գլխավոր դատախազը պետք է մտնի ԱԺ: Եկեք պատկերացնեք, թե ինչ տեղի կունենա այդ օրը Հայաստանում, դա կլինի հեղափոխության վերջը: Սերժ Սարգսյանը, եթե ուզում է թող փորձի»,- ասաց նա:
12.30
Նիկոլ Փաշինյանը բերման ենթարկվածների հարցով դիմեց ոստիկանությանը.
Երեխեքի ցավը տանեմ, կգնան, երեք ժամ կհանգստանան, կգան: Սիրելի´ ոստիկաններ, ոնցոր միշտ անում եք, բերման ենթարկվածներին, խնդրում ենք, սուրճ հյուրասիրեք, կոնֆետ, քաղցրավենիք, որովհետև մենք ձեր եղբայրն ենք, դուք էլ մեր եղբայրն եք:
12.05
Հատուկջոկատայինները մտան երթի շարքերը և շուրջ 10 հոգու բերման ենթարկեցին:
12.00
Նիկոլ Փաշինյանը զանգահարեց Ոստիկանության Նոր Նորքի բաժանմունք և պաշտոնապես տեղեկացրեց շտապ հավաք կազմակերպելու մասին:
Հեռախոսազրույցի վերջում նա ևս մեկ անգամ ճշտեց իրազեկվա՞ծ եք:
11.55
Նիկոլ Փաշինյանը հայտարարեց, որ իրենց հավաքը շտապ հավաք է, քանի որ գիշերը կոտրել են իրենց ակտիվիստների մեքենաները և քաղաքացիական հագուստով ինչ -որ մարդիկ բռնություն են կիրառել ակտիվիստների նկատմամբ և այս ինքնաբուխ հավաքով իրենք արձագանքում են այդ դեպքերին:
Օսիպիյանը չհամաձայնվեց Փաշինյանի հետ՝ նշելով, որ իրենք նախապես այս ակցիան ծրագրել էին:
11.45
Նիկոլ Փաշինյանն իր համախոհներին կոչ արեց մեծ խմբերով մոտենալ 5-րդ Մասիվի «Տիտան» սուպերմարկետի մոտ: Տեղում մեծաքանակ ոստիկաններ են աշխատում և շրջապատել են ակցիայի մասնակիցներին:
Նիկոլ Փաշինյանը կոչ արեց իր համախոհներին քաղաքի բոլոր հատվածներում փակել փողոցները, ինչպես նաև համախմբված լինել, որպեսզի ոստիկանությունը բերման ենթարկելու հնարավորություն չունենա:
