Ազգային ժողովի «Ելք» խմբակցության ղեկավար Նիկոլ Փաշինյանը կարծում է, որ մայիսի 1-ին խորհրդարանում վարչապետի ընտրությունից հետո արտահերթ խորհրդարանական ընտրությունները պետք է իրականացվեն երկու ամսվա ընթացքում, սակայն պատրաստակամություն է հայտնում քաղաքական այլ ուժերի հետ հարցը քննարկել և ընտրություններն ավելի ուշ կազմակերպել: Ազգային ժողովում լրագրողների հետ զրույցում Նիկոլ Փաշինյանն ընդգծեց, որ արտահերթ ընտրությունների կազմակերպման ժամկետի հետ կապված ունեն իրենց պատկերացումները, սակայն պատրաստ են քննարկել այլ քաղաքական ուժերի առաջարկները:
«Մենք ունենք մեր պատկերացումները, սակայն քաղաքական դաշտի տարբեր ուժերի կողմից անհանգստություններ են հնչում, որ եթե մենք ցանկանում ենք բոլորի համար հավասար պայմաններ ապահովել, պետք է այնպես անենք, որ քաղաքական դաշտը պատրաստվի այդ իրադարձությանը: Մենք մտածում ենք, որ կարելի է երկու ամսվա ընթացքում անել ընտրությունները, սակայն այս թեման քննարկելի ենք համարում, որ կարելի է մի փոքր ավելի ուշ անել, սակայն տրամաբանության սահմաններում, որպեսզի քաղաքական դաշտն ավելի պատրաստ լինի այդ իրադարձությանը»,- ասաց Փաշինյանը:
Հարցին' հնարավո՞ր է արտահերթ ընտրություններն անցկացվեն մեկ տարվա ընթացքում, Փաշինյանը պատասխանեց. «Կարծում ենք, որ մեկ տարին շատ երկար ժամկետ է, սակայն հարցը քննարկելի է: Պետք է բոլոր փաստարկները կշռել»:
