Հայաստանի Հանրապետությունում գործող որոշ դպրոցներում իրականացվող անթույլատրելի ցանկացած գործողություն պետք է վերացվի:
«Արմենպրես»-ի հաղորդմամբ`լրագրողների հետ զրույցում այս մասին շեշտեց ՀՀ կրթության և գիտության նախարար Արայիկ Հարությունյանը:
Երևանի Մոնթե Մելքոնյանի անվան թիվ 11 դպրոցի շուրջ արծարծվող խնդիրների վերաբերյալ նախարարն ընդգծեց, որ իրենք դեռ ունեն անելիքներ:
«Այդ դպրոցում ուսուցչական կազմի մեջ դեռ լարվածություն կա և ես, Երևանի քաղաքապետարանի հանրակրթության վարչության պետ Աննա Ստեփանյանի հետ փորձելու եմ լուծումներ գտնել այդ խնդրի վերաբերյալ»,- նշեց Հարությունյանը:
Նա նաև ընդգծեց, որ, ընդհանուր առմամբ բոլոր դպրոցներին հորդորել է, որպեսզի այն աշակերտները, ուսուցչական կազմերը, ովքեր բողոքում են իրենց նախկին կամ գործող ղեկավարությունից, գրավոր տեսքով ներկայացնեն դրանք հենց իրեն:
«Ես կփորձեմ նրանց հետ միասին այդ հարցերին լուծում գտնել, որովհետև այն մթնոլորտը, որ ձևավորվում է դպրոցներում այնքան էլ չի նպաստում նման խնդիրների լուծմանը: Նախկինում որոշ տնօրեններ, ուսուցիչներ, ծայրահեղ անթույլատրելի գործողություններ են իրականացրել: Այժմ մենք կփորձենք լուծել այդ խնդիրները` համագործակցելով ծնողների և աշակերտների հետ, իսկ որտեղ հանցակազմ է եղել, նաև իրավապահների հետ»,- եզրափակեց նախարարը:
