![](http://mediamall.am/timthumb.php?src=upload/195812.png&w=300&h=200&mt=1541153565)
Լոռու մարզի Վանաձոր քաղաքում ՀՀ ոստիկանության վեցերորդ վարչության մի խումբ դիմակավորված աշխատակիցներ որոշակի գործողություններ են իրականացնում: Այս տեղեկությունը ԼՈՒՐԵՐ.com-ի հետ զրույցում հաստատեց ՀՀ Ոստիկանության լրատվության և հասարակայնության հետ կապերի վարչության պետ Աշոտ Ահարոնյանը:
Ըստ մամուլի հրապարակումների՝ ոստիկանները խուզարկություն են իրականացնում քրեական հեղինակություն համարվող մի շարք անձանց բնակարաններում, խոսվում է նաև հայտնաբերված զենք-զինամթերքի մասին:
Աշոտ Ահարոնյանը մեզ հետ զրույցում միայն նշեց, որ ոստիկանների գործունեությունն իրականացվում է հարուցված հատուկ քրեական գործի շրջանակներում, այլ մանրամասներ չհաղորդելով:
Խուզարկությունների հիմնական պատճառը կապվում է այս տարվա հոկտեմբերի 11-ին Վանաձոր քաղաքում աղմկահարույց կրակոցների փաստի հետ, երբ հոգեհանգստի մասնակիցներից 3 հոգի «Նավակ» ռեստորանային համալիրի մոտից հրազենային վնասվածքներով տեղափոխվել էին հիվանդանոց։
Նշենք, որ նույն ժամանակահատվածում ոստիկանությունը Վանաձորում հայտնաբերել էր նաև այրված ավտոմեքենա և տեղեկություններ կան, որ հրկիզված ավտոմեքենան կապ ունի կրակոցների հետ: