Դեկտեմբերի 16-ին Օդեսայում ՀՀ գլխավոր հյուպատոսությունը մասնակցեց Օդեսայում արդեն ավանդույթ դարձած «Բարեգործական դիվանագիտական Ամանորյա տոնավաճառ»-ին:
Ինչպես «Արմենպրես»-ին տեղեկացրին ՀՀ արտաքին գործերի նախարարության լրատվության և հանրային դիվանագիտության վարչությունից, բացման արարողությանը ներկա էին Օդեսայի քաղաքապետ Գենադի Տրուխանովը (Геннадий Труханов), Ուկրաինայի ԱԳՆ, մարզային և այլ պետական մարմինների ու հասարակական կազմակերպությունների ներկայացուցիչներ:
Տոնավաճառի հայկական տաղավարում ներկայացված էին հայկական ավանդական ուտեստներ, քաղցրավենիք, կոնյակ, ազգային հուշանվերներ, զարդեր և ազգությամբ հայ գեղանկարիչների աշխատանքներ:
Միջոցառման համերգային հատվածի ընթացքում ներկաներն առիթ ունեցան ունկնդրելու Օդեսայի հայ համայնքի «Արաքս» վոկալ խմբի և «Սուրբ Գրիգոր Լուսավորչի թոռներ» գրական-ազգագրական ստուդիայի սաների կատարումները:
«8-րդ բարեգործական դիվանագիտական Ամանորյա տոնավաճառ»-ի կազմակերպչական աշխատանքներում իր ակտիվ մասնակցությունն ունեցան Օդեսայի հայ համայնքի կանանց կոմիտեն և երիտասարդ մայրերի միությունը: Վաճառքից գոյացած հասույթը տրամադրվել է Օդեսայի թիվ 5 ծննդատանը:
