Արցախի Հանրապետության պետական նախարար Գրիգորի Մարտիրոսյանի գլխավորած միջգերատեսչական պատվիրակությունը հունվարի 19-ին այցելել է Քաշաթաղի շրջանի հյուսիսային թևի Սոնասարի ենթաշրջան, ծանոթացել պետական և մասնավոր միջոցներով իրականացվող ծրագրերին և անցկացրել աշխատանքային խորհրդակցություն։

Ինչպես «Արմենպրես»-ին տեղեկացրին Արցախի Հանրապետության պետական նախարարի աշխատակազմի տեղեկատվության և հասարակայնությաՆ  հետ կապերի բաժնից, այցի սկզբում պետական նախարարը նախ Բերձորում այցելել է երկաթբետոնե կոնստրուկցիաներ արտադրող «Քոչար-Շին» նորաբաց ՍՊ ընկերություն և ծանոթացել իրականացվող աշխատանքներին։ Գ․ Մարտիրոսյանը կարևորել է էլեկտրական մետաղյա սյուների տեղադրման գործում օգտագործվող արտադրանքի թողարկումը՝ ընդգծելով դրա անհրաժեշտությունը հանրապետության էներգետիկ ոլորտի զարգացման գործում։ Այնուհետև պետական նախարարն այցելել է Աղավնոյի 110/35/10 ԿՎտ լարման 80 մՎԱ ենթակայան, որտեղ ծանոթացել է տեխնիկական վերազինման աշխատաքներին։

Գ․ Մարտիրոսյանի այցի հաջորդ կանգառը Աղավնո գյուղի մոտակայքում կառուցվող 6,8 ՄՎտ դրվածքային հզորությամբ «Էմ-Էներգո-Էլ» ջրամբարով ՀԷԿ-ն է, որտեղ պետնախարարը ծանոթացել է շինարարական աշխատանքների ընթացքին, հետաքրքրվել շահագործման ժամկետների մասին։

Պետնախարարի՝ Քաշաթաղի շրջանի հյուսիսային թև այցելությունը նույնպես սկսվել է կառուցվող և գործող ՀԷԿ-երից, որոնք աշխատում են Հոչանց գետի ջրային ռեսուրսների միջոցով։ Գ․ Մարտիրոսյանն ընդգծել է, որ ՀԷԿ-երի կառուցումը տնտեսության կայուն և հեռանկարային զարգացման համար ռազմավարական նշանակություն ունի, սակայն այն չպետք է իրականացվի բնապահպանական նորմերի խախտմամբ։ Գ․ Մարտիրոսյանը տեղում հանձնարարական է տվել բնապահպանության նախարարին՝ ավելի աչալուրջ հսկողություն իրականացնելու հանրապետության տարածքում գործող բոլոր ՀԷԿ-երում բնապահպանական պահանջների պահպանման նկատմամբ։

Ժամանելով Սոնասար գյուղական համայնք՝ պետական նախարարն այցելել է տեղի դպրոց, որտեղ ներկայումս մասնավոր միջոցներով իրականացվում են շինարարական աշխատանքներ։ Պատասխանատուները Գ․ Մարտիրոսյանին տեղեկացրել են, որ աշխատանքները մոտ ապագայում ավարտին կհասնեն, և գյուղի աշակերտների համար կստեղծվեն ուսումնառության ավելի հարմարավետ պայմաններ։

Այնուհետև պետական նախարարը Սոնասարում ենթաշրջանի ավելի քան տասը համայնքների ղեկավարների մասնակցությամբ անցկացրել է աշխատանքային խորհրդակցություն՝ քննարկելով ենթաշրջանի խնդիրները։ Գ․ Մարտիրոսյանը նախ ներկայացրել է պետական քաղաքականության շրջանակներում համայնքների բնակիչների համար նախատեսված ծրագրերը՝ նշելով, որ արդյունավետ համագործակցության համար համայնքների ղեկավարները պետք է դրանց մասին պատշաճ կերպով իրազեկեն բնակիչներին։ Պետնախարարը նաև գոհունակությամբ է արձանագրել, որ բյուջետային նախորդ տարում ենթաշրջանի համայնքները գերակատարել են սեփական եկամուտները, ինչը կարևոր ցուցանիշ է վերաբնակեցման գոտու բնակավայրերի համար։

Իրենց հերթին համայնքների ղեկավարներն առանձին-առանձին բարձրաձայնել են բնակիչներին հուզող խնդիրների մասին։ Դրանց թվում են եղել բնակֆոնդին, ջրամատակարարմանը (խմելու և ոռոգման), աշխատատեղերին և զբաղվածությանը, աղբահանությանը և երկու համայնքի դեպքում՝ նաև համացանցային հասանելիությանը վերաբերող հարցերը։

Ըստ հերթականության պատասխանելով այս հարցերին՝ Գ․ Մարտիրոսյանը նշել է, որ բնակարանաշինության ոլորտում շարունակվելու է շինանյութի տրամադրման պետական ծրագիրը, իսկ դրանից զատ՝ գործարկվելու է նաև նոր ծրագիր, որ թույլ է տալու խիստ ցածր տոկոսադրույքով (շուրջ 1%) վարկային միջոցներ ձեռք բերել գյուղական առանձնատների շինարարության համար։ Պետնախարարն ընդգծել է, որ այս պահի դրությամբ արդեն շրջանի վարչակազմն ունի անհրաժեշտ ֆինանսատեխնիկական միջոցներ՝ աջակցելու բնակֆոնդի ստեղծման և թարմացման աշխատանքներին, ինչպես նաև առհասարակ համապատասխան բնույթի համայնքային խնդիրների լուծմանը։

Ջրամատակարարման հարցին անդրադառնալով՝ Գ․ Մարտիրոսյանը հավաստիացրել է, որ մոտակա տարիներին համակարգային լուծում է ստանալու ամբողջ հանրապետության, այդ թվում՝ տեղի համայնքների խմելու ջրի հարցը։ «Իսկ մինչ այդ, եթե համայնքներն իրենց կողմից առաջարկեն խնդրի լուծման ժամանակավոր ողջամիտ միջոցներ, ապա պետությունը կաջակցի՝ տրամադրելով խողովակներ»,- նշել է պետնախարարը։

Համացանցային հասանելիության խնդիրներ ունեցող երկու համայնքների հետ կապված Գ․ Մարտիրոսյանը հանձնարարել է էկոնոմիկայի և արտադրական ենթակառուցվածքների փոխնախարար Տիգրան Թորոսյանին՝ ուսումնասիրելու խնդրի լուծման հնարավորությունը։

Աշխատանքային ելույթներով հանդես են եկել նաև գյուղատնտեսության նախարար Ժիրայր Միրզոյանն ու բնապահպանության և բնական ռեսուրսների նախարար Ֆելիքս Գաբրիելյանը։ Ժ․ Միրզոյանը ներկաներին տեղեկացրել է գյուղոլորտում իրականացվող պետական ծրագրերի մասին՝ ըստ այգեգործական, անասնապահական և հողագործական ենթաճյուղերի։ Իր հերթին Ֆ․ Գաբրիելյանը տեղեկացրել է ենթաշրջանի տարածքում նոր անտառային ճանապարհի կահավորման մասին, որը կդյուրացնի վառելափայտի հասանելիությունը բնակիչների համար, ինչպես նաև հաղորդել է, որ սոցիալական որոշակի խմբերի համար ավելի մատչելի կդարձվեն անտառտնտեսությունից օգտվելու պայմանները։

Աշխատանքային օրվա ավարտին Գ․ Մարտիրոսյանի գլխավորած պատվիրակությունն այցելել է Հոչանց, ծանոթացել բազմազավակ ընտանիքի համար կառուցվող առանձնատան շինարարական աշխատանքներին։ Պետական նախարարը քաշաթաղյան այցը եզրափակել է Հոչանցի սբ․ Ստեփանոս եկեղեցի (մոտ 17-րդ դար) այցելությամբ, որը վերջերս հիմնանորոգվել է «Թուֆենկյան» հիմնադրամի կողմից։