Չվերթների ժամանակ ուղևորների իրավունքների խախտումներով զբաղվող և փոխհատուցում ստանալու քայլեր ձեռնարկող Passenger.am-ի ներկայացուցիչ Գուրգեն Ղազարյանը Ֆեյսբուքյան ուղիղ եթերում ներկայացրեց Միլան-Երևան չվերթի ընթացքում առաջացած խնդիրները։

Վերջինս պատմեց, որ ինքը ևս Միլան-Երևան չվերթի ուղևոր է եղել, նրա խոսքով՝ մեկնումը պետք է տեղի ունենար Իտալիայի ժամանակով ժամը 6-ին, իսկ հաշվառմանը մոտ 100-ից ավելի մարդ սպասարկվել են, ընդամենը, մեկ պատուհանից․ «Բնականաբար ֆիզիկապես հնարավոր չէ՝ մեկ պատուհանը կարողանա սպասարկել 100-ից ավելի ուղևորի։ Հետևաբար թռիչքը դատապարտվեց լուրջ խնդիրների։ Ինձ հաջողվեց օդանավ մուտք գործել, որտեղ պարզ դարձավ, որ մոտ 40 ուղևոր չի կարողացել մտնել օդանավ, նույնիսկ նրանք, ովքեր չվերթից մոտ 4 ժամ առաջ օդանավակայանում են եղել, ստիպված են եղել երկու ժամ էլ սպասել հաշվառմանը»,- ասաց նա։

Նրա խոսքով՝ խոսքը միայն այս չվերթի մասին չէ ու թեև գիտակցում են, որ այն նոր ընկերություն է, սակայն նման խնդիրները պետք է ունենան հիմնարար լուծումներ․ «Արդյունքում ունենք մի իրավիճակ, երբ մեր քաղաքացիների մի մասն այլ ավիաընկերությունների միջոցով Հայաստան տեղափոխվեցին, մյուս մասը՝ դեռ չի էլ տեղափոխվել։ Հայաստանում սպասարկման որակը բարձր էր, սակայն այստեղ ծրագրային խնդիրներ կային, օրինակ՝ ծրագիրը ցույց չի տվել ուղեբեռի առկայությունը»,- նշեց նա։

Ղազարյանը նշեց, որ Ryanair-ի տարբեր չվերթներից բազմաթիվ բողոք-նամակներ ունեն։ Օրինակ՝ ուղևորը տոմս և նստատեղ է գնել, սակայն նրան ասել են, որ նստատեղ չի գնվել և հավելյալ 50 եվրո է անհրաժեշտ։

Հիշեցնենք, որ երեկ՝ հունվարի 29-ին, Ryanair-ը Միլան-Երևան չվերթի մի քանի տասնյակ ուղևորների մերժել է նստեցնել ինքնաթիռ, քանի որ գրանցման հարցում խնդիրներ են առաջացել։ Ryanair-ը պարզաբանել է՝ «Զվարթնոց» օդանավակայանի ծրագիրը հին է և չի համապատասխանում Ryanair-ի գործող ծրագրին։ Ըստ սոցցանցերում արված քննարկումների՝ խնդիրն առաջացել է նրանից, որ ուղևորները նախապես առցանց չեն գրանցվել։