ՀՀ վարչապետ Նիկոլ Փաշինյանի մամուլի խոսնակ Մանե Գևորգյանը հերքեց տարածված տեղեկությունը, թե Նիկոլ Փաշինյանը երկու օր առաջ հանդիպել է ՀՀ առաջին նախագահ Լևոն Տեր-Պետրոսյանի հետ՝ ԼՈՒՐԵՐ․com-ի հետ զրույցում նշելով, որ վարչապետն այդ ժամանակ եղել է մեկուսացված և որևէ հանդիպում չի ունեցել․ «Վարչապետը ՀՀ առաջին նախագահ Լևոն Տեր-Պետրոսյանի հետ հանդիպել է մեկ անգամ, որը տեղի է ունեցել հեղափոխությունից հետո՝ 2018 թ․ հուլիսի 16-ին, որից հետո վերջինիս հետ հանդիպում չի եղել։ Եթե հանդիպում եղած լիներ, գաղտնի չէինք պահի և այդ մասին հանրությանն ու լրատվական դաշտին կտեղեկացնեինք»,- ասաց խոսնակը։ Ավելի վաղ հայտնել էինք, որ «Փաստինֆո»-ի տեղեկություններով՝ երկու օր առաջ ՀՀ վարչապետ Նիկոլ Փաշինյանը հանդիպել է ՀՀ առաջին նախագահ Լեւոն Տեր-Պետրոսյանին։ Ընդ որում՝ հանդիպման ժամանակ վարչապետը դեռ պաշտոնապես համարվում էր կորոնավիրուսով հիվանդ։ Կայքն արձանագրել էր, որ այդ հանդիպումից հետո ազատվեցին ԱԱԾ տնօրենն ու ոստիկանապետը՝ նրանց փոխարինելով ծանոթ-բարեկամական կադրերով։