Առողջապահության համաշխարհային կազմակերպության (ԱՀԿ) արտակարգ իրավիճակների ծրագրերի ղեկավար Մայքլ Ռայանի կարծիքով` կորոնավիրուսային պանդեմիայի երկրորդ ալիքը կարող է և չլինել:

 

«Վստահություն չկա, որ երկրորդ ալիքը կլինի»,- ասել է նա։

Ռայանը մոլորեցնող է անվանել համավարակի երկրորդ ալիքի վերաբերյալ կանխատեսումները: «Այս հիվանդության ամենասկզբից շատ մոլորեցնող շահարկումներ եղան այն մասին, թե ինչ է տեղի ունենալու, երբ սեզոնը փոխվի», - բացատրել է նա ՝ հավելելով, որ «միշտ էլ դժվար է կանխատեսել, թե ինչ է լինելու նոր վիրուսի հետ»: 

Փորձագետի խոսքով՝ շատ երկրներում դեպքերի տեմպի ներկայիս աճը չպետք է համարել երկրորդ ալիք, այլ  համաճարակի «երկրորդ գագաթ», քանի որ մինչ այս պահը «վիրուսի վրա բավարար ճնշում չի գործադրվել՝ կանխելու դրա տարածումը»:

 Ռայանը նաև կոչ է արել բոլոր ուժերը ներդնել՝ վիրուսի դեմ պայքարում, որպեսզի հնարավոր  երկրորդ ալիքի ժամանակ խուսափենք վատթարագույնից: «Եթե մենք ստիպված լինենք պայքարել երկրորդ ալիքի դեմ, ապա մենք դա կանենք»,- ասել է նա ՝ շեշտելով, որ այս պայքարը կլինի ավելի արդյունավետ, եթե «առաջին ալիքից դասերը քաղվեն»: