Ապրիլի 8-ին Մոսկվայում կկայանա Ռուսաստանի Դաշնության եւ Հայաստանի արտգործնախարարների հանդիպումը։ Այս մասին ապրիլի 6-ին կայացած ճեպազրույցի ժամանակ հայտարարել է ՌԴ ԱԳՆ պաշտոնական ներկայացուցիչ Մարիա Զախարովան։ Արտգործնախարարները մանրամասն կքննարկեն երկկողմ համագործակցության քայլերը բոլոր ոլորտներում, ինտեգրացիոն միություններում եւ այլ միջազգային հարթակներում:

Նաեւ մտքերի հանգամանալից փոխանակում տեղի կունենա Հայաստանի, Ադրբեջանի եւ Ռուսաստանի ղեկավարների 2020 թվականի նոյեմբերի 9-ի, հունվարի 11-ի եւ 2021 թվականի նոյեմբերի 26-ի եռակողմ հայտարարությունների կատարման վերաբերյալ։

«Հուսով ենք, որ Մոսկվայում կայանալիք բանակցությունները կնպաստեն դաշնակցային փոխգործակցության խորացմանը, խաղաղության եւ կայունության գործի առաջխաղացմանն Անդրկովկասում»,- ասել է ՌԴ ԱԳՆ ներկայացուցիչը։

Արարատ Միրզոյանի այցից հետո՝ ապրիլի ընթացքում, ինչպես նախօրոք հայտարարել էին Երևանն ու Մոսկվան, սպասվում է վարչապետ Նիկոլ Փաշինյանի այցելությունը ՌԴ և հանդիպումը Վլադիմիր Պուտինի հետ։