Այսօր՝ ապրիլի 14-ին, ավտովթար է տեղի ունեցել Կոտայքի մարզում: Ժամը 16:00-ի սահմաններում Արագածոտնի մարզի Կարպի գյուղի բնակիչ, 48-ամյա Երվանդ Նանյանը, վարելով ВАЗ 21 02 մակնիշի 21 ԼՕ 127 համարանիշի ավտոմեքենան, Երևան-Սևան ավտոմայրուղու 39 կմ հատվածում, դուրս է եկել երթևեկելի գոտուց և բախվել հաստաբուն ծառին:
Ինչպես վթարի վայրից հայտնում է ֆոտոլրագրող Գագիկ Շամշյանը, վարորդին և ուղևորին՝ նույն գյուղի բնակիչ, 44-ամյա Նատաշա Նանյանին, ավտմեքենայից դուրս են բերել քաղաքացիներն ու ճանապարհային ոստիկանության 2-րդ սպայական գումարտակի 3-րդ վաշտի աշխատակիցները՝ ՃՈ տեսուչ Տիգրան Նաջարյանի գլխավորությամբ: Վիրավորները տեղափոխվել են Հրազդանի բժշկական կենտրոն:
Այս պահին ժամանել են նաև Հրազդանի հրշեջ-փրկարարական ջոկատի աշխատակիցները՝ հրամանատար Սամվել Դավթյանի գլխավորությամբ, ովքեր պարզում են, թե արդյոք ավտոմեքենայից գազի արտահոսք կա, թե ոչ:
Վթարի վայրում քննչական աշխատանքները ղեկավարում է ոստիկանության քննչական գլխավոր վարչության Կոտայքի մարզի քննչական բաժնի քննիչ Մամիկոն Սարգսյանը, ում հանձնարարականով ավտոմեքենան տեղափոխվում է ոստիկանության Հրազդանի բաժնի հատուկ պահպանվող տարածք:
Լուսանկարը՝ Գագիկ Շամշյանի
