Ընդդիմադիր կուսակցությունները Վրաստանում հոկտեմբերի 26-ին կայանալիք խորհրդարանական ընտրություններից հետո սահմանադրական հեղաշրջման սցենար են պատրաստել։ Այս մասին հայտարարել է Վրաստանի խորհրդարանի նախագահ Շալվա Պապուաշվիլին, գրում է ՏԱՍՍ-ը։

«Նման սցենարի բոլոր պայմանները կան՝ նախապես պատրաստված տեխնիկական կառավարություն, տեղական դիտորդներ, որոնք իրականում ունեն ընտրությունների քաղաքական նպատակներ, և ընտրությունների վերաբերյալ նրանց նախապես պատրաստած կեղծ եզրակացությունները։ Մենք տեսնում ենք սահմանադրական նախապես հայտարարված սցենար՝ հեղաշրջում, և մենք տեսնում ենք, որ վերջին երկու շաբաթներն այս առումով ակտիվ կլինեն»,- ասել է Պապուաշվիլին Աջարիայի հանրային հեռարձակողի հետ հարցազրույցում։

Պապուաշվիլին նաև մեկնաբանել է տեխնիկական կառավարության գաղափարը, որն ընդդիմությանն առաջարկել է Վրաստանի նախագահ Սալոմե Զուրաբիշվիլին։ Նրա կարծիքով, եթե ընտրություններում հաղթեն ընդդիմադիր կուսակցությունները, կձևավորվի ժամանակավոր կառավարություն, որի խնդիրն է լինելու բարեփոխումներ իրականացնել։ 2025 թվականին նախագահի առաջարկած կանոնադրության համաձայն, որը ստորագրել են ընդդիմության առաջնորդները, կանցկացվեն կրկնակի ընտրություններ։

«Երբ խունտան գալիս է իշխանության, ըստ երևույթին, ինչ-որ մեկը դրսից մեզ նայում է՝ որպես «բանանային հանրապետություն», և կանոնադրությունը դա հաստատում է», - ասել է Պապուաշվիլին։