Հանրապետության նախագահը բազմիցս հայտարարել է, որ չպետք է հանդուրժել հանրապետությունում թիկնապահներով շրջելը, իսկ ՀՀ ոստիկանապետ, գեներալ-լեյտենանտ Վլադիմիր Գասպարյանը բազմիցս հայտարարել է, որ անկախ կուսակցական պատկանելիությունից, զբաղեցրած դիրքից ու պաշտոնից՝ այն անձինք, ովքեր անօրինական կշրջեն թիկնապահներով, ապա ոստիկանությունը օրենքի սահմաններում համարժեք քայլերի է դիմելու: Այս մասին գրում է Shamshyan.com-ը:

Երեկ՝ ապրիլի 29-ին, Երևանի նորանշանակ ոստիկանության պետ, ոստիկանության գնդապետ Աշոտ Կարապետյանի հանձնարարականով՝ ոստիկանության Երևան քաղաքի վարչության քրեական հետախուզության բաժնի և ոստիկանության Երևան քաղաքի պարեկապահակային ծառայության գնդի աշխատակիցները ոստիկանության Երևան քաղաքի վարչություն են տեղափոխել 4 անձի:

Ինչպես հայտնում է ֆոտոլրագրող Գագիկ Շամշյանը, նշված անձանցից երեքը Գեղարքունիքի մարզի բնակիչներ են, իսկ մեկը՝ ՌԴ քաղաքացի:

Նշված անձինք են Արա Բանդուրյանը, Արտյոմ Խոջոյանը, Հովսեփ Հովհաննիսյանը և Վյաչեսլավ Տրետյակովը:

Երևան քաղաքի Ոստիկանությունը օպերատիվ տեղեկություն է ստացել, որ Ա. Բանդուրյանը «Mercedes G 500» մակնիշի՝ 77 NT 777 համարանիշի ավտոմեքենայով, երթևեկության կանոնները կոպտորեն խախտելով, Երևանում շրջում էր իրեն ուղեկցող «ВАЗ 21 21» մակնիշի՝ 66 RR 669 համարանիշի ավտոմեքենայով:

Մի քանի փողոցներում ճանապարհային երթևեկության կանոնները խախտելուց հետո ոստիկանությունը ստիպված նրանց տեղափոխեց Երևանի ոստիկանություն, որտեղից էլ Երևանի ճանապարհային ոստիկանության աշխատակիցները նշված անձանց տրանսպորտային միջոցները տեղափոխեցին ՃՈ հատուկ պահպանվող տարածք:

Ֆոտոլրագրողը հայտնում է նաև, որ Ա. Բանդուրյանը հանցագործ աշխարհում համարվում է հեղինակություն՝ որպես «Նորատուսցի Արա»:

Լուսանկարը՝ Գագիկ Շամշյանի