Որդու և հարսի կողմից մորն ու տատիկին խոշտանգելու գործով Էրեբունի և Նուբարաշեն վարչական շրջանների ընդհանուր իրավասության դատարանում այսօր ավարտվեց գործով դատաքննությունը, իսկ մինչ այդ հարցաքննվեց փորձագետ Արսեն Բաբայանը: Փորձագետը դատարան էր հրավիրվել ամբաստանյալի պաշտպանի միջնորդության հիման վրա եւ հարցաքննության ընթացքում փորձում էին ապացույցներ ստեղծել թե տատիկը գուցեեւ մարմնական վնասվածքներ է ստացել բարձր ճնշման պատճառով վայր ընկնելու հետեւանքով: Ամբաստանյալ Գուրգեն Գրիգորյանի պաշտպան Ռաֆիկ Սաֆարյանը նախ հարց ուղղեց փորձագետին' պարզելու, թե արդյոք հնարավոր է ծանր մարմնական վնասվածք պատճառել բարձով հարվածելու դեպքում, ինչին փորձագետը դրական պատասխան տվեց' ասելով, որ հնարավոր է: Իսկ ամբաստանյալ Գուրգեն Գրիգորյանին հետաքրքրում էր, թե հնարավոր է իր տատիկը փակ գանգուղեղային վնասվածք ստանար բարձր ճնշման կամ վայր ընկնելու հետևանքով եւ ստացավ բացասական պատասխան: Փորձագ- վկայի հարցաքննության ավարտից հետո ամբաստանյալ Գուրգեն Գրիգորյանը միջնորդեց լրացուցիչ հարցաքննել եւս 2 վկա և տուժող Նազիկ Կարապետյանին, ինչը մերժվեց: Հաջորդ' հուլիսի 12 -ին կայանալիք նիստին մեղադրող դատախազը հանդես կգա ճառով: Հիշեցնենք, որ Գուրգեն և Սյուզաննա Գրիգորյանները մեղադրվում են Գուրգենի մորը՝ Թագուհի Գրիգորյանին և տատիկին' Նազիկ Կարապետյանին մարմնական և հոգեկան տառապանքներ պատճառելով խոշտանգելու մեջ: Գուրգեն Գրիգորյանի նկատմամբ որպես խափանման միջոց է ընտրվել կալանավորումը, իսկ Սյուզաննա Գրիգորյանի նկատմամբ՝ չհեռանալու մասին ստորագրությունը:
