Որդու և հարսի կողմից մորն ու տատիկին խոշտանգելու գործով Էրեբունի և Նուբարաշեն վարչական շրջանների ընդհանուր իրավասության դատարանում այսօրվա նիստին մեղադրող դատախազը միջնորդեց գործով ամբաստանյալ Գուրգեն Գրիգորյանին դատապարտել 6 տարվա ազատազրկման:

Ըստ մեղադրանքի' Գուրգեն Գրիգորյանը իր կնոջ' Սյուզաննա Գրիգորյանի հետ, տան հետ կապված և կենցաղային հարցերով 01.02.2012թ. մինչև 11.06.2012թ. ընկած ժամանակահատվածում ուժեղ ցավ, մարմնական և հոգեկան տառապանքներ պատճառելով, խոշտանգել են Գ.Գրիգորյանից նյութական և այլ հարազատական կախվածության մեջ գտնվող վերջինիս մորը' Թագուհի Գրիգորյանին,և տատիկին' Նազիկ Կարապետյանին: Գրիգորյանը պարբերաբար վիճել է մոր հետ, հայհոյանքներ տվել, ծեծի ենթարկել և թքել մոր վրա: Նրա նկատմամբ որպես խափանման միջոց է ընտրվել կալանավորումը, իսկ Սյուզաննա Գրիգորյանի նկատմամբ' չհեռանալու մասին ստորագրությունը:

Մեղադրող դատախազը միջնորդեց, որ դատարանը ամբաստանյալ Գուրգեն Գրիգորյանի պատիժը մեղմացնող հանգամանք հաշվի առնել այն, որ նա ունի մինչև 14 տարեկան երեխա:

Գործով մյուս ամբաստանյալ Սյուզաննա Գրիգորյանին դատախազը միջնորդեց դատապարտել 4 տարվա ազատազրկման, սակայն պատիժը պայմանական չկիրառել և սահմանել փորձաշրջան' 2 տարի ժամկետով:

Մեղադրող դատախազի ճառի ընթացքում պարզվեց, որ ամբաստանյալ Գուրգեն Գրիգորյանը իրեն լավ չի զգում և որ մինչ նիստը սկսվելը նրա համար շտապօգնություն է կանչվել, սակայն այդ մասին դատավորին չէին տեղեկացրել:

Դատավորի հարցին ի պատասխան' ամբաստանյալը հայտնեց, որ ինքնազգացողության վատ լինելը պայմանավորված է զարկերակային ճնշմամբ:

Դատական նիստը հետաձգվեց' ամբաստանյալ Գուրգեն Գրիգորյանի առողջական վիճակի պատճառով, իսկ հաջորդ նիստը տեղի կունենա օգոստոսի 6-ին: Ճառով հանդես կգան տուժողը և տուժողի ներկայացուցիչը:

Հեղինակ:
«Փաստինֆո»