Վերջին 10 տարում մասնագիտական պարտքը կատարելիս սպանվել է ավելի քան 600 լրագրող: Զինված գործողությունների պայմանններում լրագրողների սպանությունններն ու հետապնդումները պաhանջում են միջազգային հանրության, այդ թվում՝ ՄԱԿ-ի Անվտանգության խորհրդի կողմից պաշտպանության ավելի վճռական միջոցներ: Այս մասին հայտնել է ՄԱԿ-ի Գլխավոր քարտուղարի առաջին տեղակալ Յան Էլիասսոնը՝ ելույթ ունենալով Անվտանգության խորհրդի նիստում: «Անվտանգության խորհուրդը կարող է կարևոր դերակատարում ունենալ՝ արձագանքելով և արտահայտվելով ընդդեմ ԶԼՄ-ների ճնշման: Չէ որ, երբ լրագրողներին սպանում են, խաղաղությանը և անվտանգությանը սպառնացող վտանգի մասին տեղեկատվությունն անհետանում է», - հայտարարել է Էլիասսոնը՝ ելույթ ունենալով «Զինված հակամարտությունների ժամանակ քաղաքացիական անձանց պաշտպանությունը. լրագրողների պաշտպանությունը» թեմայով ԱԽ-ի բաց քննարկման ընթացքում: ՄԱԿ-ի մամլո ծառայության փոխանցմամբ՝ Գլխավոր քարտուղարի առաջին տեղակալն ընդգծել է, որ զինված հակամարտություններում «չորրորդ իշխանության» ներկայացուցիչները հատկապես խոցելի են: Նա նշել է, որ միայն Սիրիայում անցյալ տարի սպանվել է 41 լրագրող, այդ թվում՝ սոցիալական ցանցերում աշխատող ԶԼՄ-ների երկու ներկայացուցիչներ: 2006թ.-ից ի վեր Իրաքում և Աֆղանստանում զոհվել են 108 լրագրողներ: «Լրագրողների վրա հարձակումները կրում են առևանգման, պատանդ վերցնելու, ճնշելու, վախեցնելու և ապօրինի ձեռբակալությունների ձևեր: Կին լրագրողներն ավելի հաճախ դառնում են բռնաբարության զոհեր», - ասել է ՄԱԿ-ի ներկայացուցիչը: Յան Էլիասսոնը կոչ է արել ջանք չխնայել լրագրողների նկատմամբ հանցագործությունները բացահայտելու ուղղությամբ: Նա անընդունելի և ցնցող է համարել այն, որ լրագրողների սպանության դեպքերի 90 տոկոսից ավելին մնում է չբացահայտված և անպատիժ: ՄԱԿ-ի Անվտանգության խորհրդի նախագահ, ՄԱԿ-ում ԱՄՆ-ի Մշտական ներկայացուցչության գործերով ժամանակավոր հավատարմատար Ռոզմարի Դի Կարլոն իր հերթին նշել է, որ ԱԽ-ի կողմից լրագրողների պաշտպանության հարցի 2006թ.-ի վերջին քննարկումից հետո ԶԼՄ-ների ներկայացուցիչների նկատմամբ բռնությունները չեն դադարել: Նա նշել է, որ 2012թ.-ին ամբողջ աշխարհում սպանվել է 121 լրագրող, ավելի քան 200-ը բանտարկվել են և շատերն ենթարկվել են հարձակումների:
