Հայաստանի երիտասարդության ազգային զեկույցի համաձայն՝ հարցված երիտասարդների 78.5 տոկոսը հնարավորության դեպքում տարբեր նպատակներով կմեկներ Հայաստանից, իսկ 36.8 տոկոսը՝ կմեկներ ընդմիշտ: Այդուհանդերձ, Հայաստանում սկսում է ձևավորվել նաև ակտիվ, ոչ անտարբեր երիտասարդության մի շերտ, որը ներառում է թե՛ տեղացի, թե՛ սփյուռքահայ և փախստական երիտասարդների: Այդ մասին նշվել է Երիտասարդության համաշխարհային օրվա կապակցությամբ այսօր ՄԱԿ-ի երևանյան գրասենյակում տեղի ունեցած ասուլիսում: Այս տարի ողջ աշխարհում Երիտասարդության համաշխարհային օրն անցնում է «Երիտասարդների միգրացիա. առաջ մղելով զարգացումը» կարգախոսի ներքո: Ըստ ՄԱԿ-ի սոցիալ-տնտեսական հարցերի վարչության ազգաբնակչության բաժնի տվյալների, աշխարհում կա 15-ից 24 տարեկան մոտ 27 միլիոն միգրանտ, ինչը կազմում է աշխարհի 214 միլիոն միգրանտների մոտ մեկ ութերորդը: Վերջին մի քանի տասնամյակների ընթացքում աշխարհի շատ հատվածներում քաղաքական, տնտեսական, սոցիալական և ժողովրդագրական փոփոխությունները խթան հանդիսացան հիմնականում դեպի քաղաքներ արտագաղթի համար՝ ինչպես երկրների ներսում, այնպես էլ երկրից երկիր: Ընդ որում, զարգացող երկրներից դեպի զարգացած երկրներ ավանդական արտագաղթին զուգահեռ հստակորեն ուրվագծվում է մեկ զարգացող երկրից մյուս զարգացող երկիր արտագաղթի միտումը: Մասնավորապես, վերջին տարիներին Հայաստան են եկել մեծ թվով իրաքահայ և սիրիահայ փախստական երիտասարդներ: «Պարզ է, որ միգրացիան վտանգներ է պարունակում թե՛ մեր երկրի, թե՛ հատկապես երիտասարդ միգրանտների համար՝ Հայաստանից տանելով ուժերով լի, վերարտադրողական լավագույն տարիքում գտնվող մեր հայրենակիցներին, նրանց երբեմն կանգնեցնելով խտրականության և շահագործման ռիսկի առջև: Սակայն պետք է կարողանալ տեսնել և ճիշտ օգտագործել նաև այդ երևույթի բերած հնարավորությունները», - նշել է ՄԱԿ-ի Բնակչության հիմնադրամի հայաստանյան գրասենյակի գործադիր ներկայացուցիչ Գարիկ Հայրապետյանը: «Նույնիսկ մեկ փախստական երիտասարդը շատ է, և անհրաժեշտ է անել ամեն ինչ՝ հասարակությունում նրանց հնարավորինս ինտեգրելու համար: Այդտեղ շատ մեծ է մեր տեղացի երիտասարդների դերը, բայց նաև փախստական երիտասարդների ակտիվ գործունեությունն այս հարցում է՛լ ավելի մեծ արդյունքներ կբերի», - իր հերթին ընդգծել է ՄԱԿ-ի Փախստականների հարցերով գերագույն հանձնակատարի գրասենյակի արտաքին կապերի և հասարակական տեղեկատվության համակարգող Անահիտ Հայրապետյանը: