ԳԱԼԱ-ի զրուցակիցն է ՀՅԴ ԳՄ անդամ, ԱԺ հինգերորդ գումարման պատգամավոր Աղվան Վարդանյանը:
-Պարոն Վարդանյան, ըստ Ձեզ՝ ինչո՞վ է պայմանավորված վերջին երկու`Երևանի ավագանու և Պռոշյանի գյուղապետի ընտրություններում ՀՅԴ-ի պարտությունը և ընտրազանգվածի նվազումը:
-Ինչո՞ւ միայն երկու, երեք պիտի համարենք, նաև ԱԺ-ի ընտրությունները, այդ բոլոր ընտրությունների վերաբերյալ մենք մեր քաղաքական գնահատականները տվել ենք և հստակ ասել, թե ինչպիսին են ընտրությունները Հայաստանում: Վերջին ընտրությունները հիմնականում պետական լծակների, վարչական ռեսուրսի և ֆինանսների միջոցով են կատարվում, և բնականաբար ժողովրդի իրական կամքը չի արտահայտվում:
Ակնհայտորեն վերջին բոլոր ընտրություններում ՀՅԴ-ն նահանջ է արձանագրել, ինչը նաև մեր ձախողումն է, որովհետև բացի արտաքին ազդակներից, մենք ևս խնդիր ունենք, այժմ մենք զբաղված ենք մեր ներքին հարցերը կարգավորելով, ներքին բարեփոխումներով, որ հասկանանք, թե մեր մեղքը ինչքան է, հասկանանք, թե ինչ պիտի տանենք, որ և՛ հասարակությունը վերափոխվի, և՛ նաև մենք վերափոխվենք:
-Պարտությունը չեք կապո՞ւմ անհատների հետ, քանի որ հենց Երևանի ավագանու ընտրությունների ժամանակ որոշ քաղաքագետներ նշում էին, որ ԳՄ-ի ցուցակը գլխավորող անձինք պետք է փոխվեն. ժամանա՞կը չէ, որ սերնդափոխություն լինի ԳՄ-ում:
-Սերնդափոխություն անհրաժեշտ է բոլոր կառույցներում՝ և՛ պետական կառավարման համակարգում, և՛ քաղաքական ուժերի մեջ և շատ բնական է. այլևս նոր սերունդ է գալիս՝ անկախության շրջանի սերունդը' ավելի ազատ մտածողությամբ: Նաև հաջորդականության, շարունակականության ապահովում, քանի որ զուտ անձերին փոխելով որևէ խնդիր չի լուծվի:
Առաջիկայում մենք մեր գերագույն ժողովը կանենք և բնական է՝ կլինի նաև սերնդափոխություն, բայց սերնդափոխություն միշտ է եղել, եթե նայեք մեր ԳՄ-ի կազմը, ԱԺ-ի պատգամավորների կազմը, կտեսնենք, որ սերնդափոխությունը մեզ մոտ շատ սահուն ընթանում է: Շատ հեշտ է կողքից ասել պիտի բոլորը փոխվեն:
Լսել ուրիշները կողքից ինչ են ասում, որոնք ներսում չեն, ամենահեշտը ադպես խոսելն է, այն մարդիկ, ովքեր ներկայացնում են ՀՅԴ-ն որպես ազգային հարստություն և մտահոգ են ՀՅԴ-ի ճակատագրով, թող գան Դաշնակցություն և վերափոխեն այն:
Ես խորապես համոզված եմ' այս նահանջը և ընտրական համակարգի քայքայումը ժամանակավոր բնույթ ունեն. շատ ավելի կարևոր է, որ մենք կարողանանք հավատարիմ մնալ մեր արժեքներին և վաղ թե ուշ և սերնդափոխությունը կլինի, և ՀՅԴ-ն իր իրական տեղը կգտնի Հայաստանում:
-ԳՄ-ում նոր երիտասարդ դեմքեր սպասե՞նք ղեկավար մարմինների կազմում:
-ՀՅԴ-ն, եթե համեմատենք մյուս քաղաքական ուժերի հետ, միակն է, որ յուրաքանչյուր երկու տարին մեկ անում է իր գերագույն ժողովը և ընտրություններ է անում, շատ կարճ ժամանակ է ԳՄ-ն ղեկավարում կառույցը, ամեն մի ԳՄ-ում բավական մեծ թարմացումներ են լինում, վստահ եմ, որ առաջիկա ԳՄ-ում ևս փոփոխություններ կլինեն ղեկավար կազմում:
Մանրամասները` այստեղ:
