Ռուսաստանը ցանկանում է, որ Իրանին С-300 զենիթահրթիռային համակարգերի մատակարարման ձախողման մասին հարցը անհետանա օրակարգից, հինգշաբթի հայտարարել է ՌԴ ԱԳ փոխնախարար Սերգեյ Ռյաբկովը:
Պայմանագրի ձախողման կապակցությամբ Իրանը պահանջում է Ռուսաստանից 4,2 մլրդ դոլար: Առաքման ձախողումը կապված էր ՄԱԿ ԱԽ բանաձևերի ընդունման հետ:
«Մենք կցանկանայինք, որ հարցը կարգավորվեր, որպեսզի այդ խնդիրն անհետանար ռուս-իրանական հարաբերությունների օրակարգից»,-ասել է Ռյաբկովը Russia Arms Expo-2013 ցուցահանդեսում, հայտնում է «ՌԻԱ Նովոստի» գործակալությունը:
Նա հավելել է, որ հայցը քննվում է Փարիզի վճռաբեկ դատարանում, և նշել է, որ պատրաստ չէ ոչինչ հավելելու ՌԴ նախագահի և «Ռոսօբորոնէքսպորտի» արդեն հրապարակված հայտարարություններին:
Այն հարցին, թե հնարավոր է, որ բանակցություններ սկսվեն Իրանին «Անտեյ-2500» զենիթահրթիռային համակարգերի առաքման շուրջ, Ռյաբկովը նշել է. «Ես պահպանում եմ այն սկզբունքը, երբ ինչ-որ բաների մասին, որոնք կոմերցիոն գաղտնիքի են վերաբերում, իսկ այս դեպքում դուք խոսում եք հնարավոր գործարքի մասին, քննարկվում են կոմերցիոն գաղտնիքի պայմաններում»:
Ավելի վաղ «Կոմերսանտ» թերթը հայտնել էր, որ ՌԴ իշխանությւնները սկզբունքային որոշում են կայացրել ընդառաջելու Իրանի ցանկություններին միանգամից երկու առանցքային հարցերի շուրջ՝ С-300 արդիականացված համակարգերի առաքման և Բուշերի ԱԷԿ-ի երկրորդ էներգաբլոկի վերաբերյալ: Ըստ թերթի Կրեմլին մոտ աղբյուրների, ՌԴ նախագահ Վլադիմիր Պուտինը կարգադրել է սկսել մշակել երկու համաձայնագրերը: Առաջինը կոչված է կարգավորելու տարակարծությունը Թեհրանի հետ ՀՕՊ համակարգերի շուրջ: Իրանին կտրամադրվի ЗРК С-300ВМ «Անտեյ-2500» հինգ դիվիզիոն, որի արժեքը մոտ 800 մլն դոլար է, 4 մլրդ դոլարի հայցը հետ կանչելու փոխարեն:
Ակնկալվում է, որ Իրանը կհամաձայնվի «Անտեյ-2500» առաքման տարբերակին: Փոխզիջման պատրաստակամության մասին անուղղակիորեն հայտարարել է նաև ՌԴ-ում Իրանի դեսպան Մահմուդ Ռեզա Սաջադին՝ նա հայտարարել է, որ Իրանի իշխանությունները կարող են «ճկուն գտնվել»:
Ռուսաստանը հրաժարվեց Իրան առաքել С-300 համալիրները 2010թ., երբ այդ երկրի դեմ ՄԱԿ-ը պատժամիջոցներ սահմանեց: Իրանական կողմը համապատասխան հայցով դիմել է դատարան և գործը շահելու լավ հնարավորություն ունի, քանի որ ՄԱԿ պատժամիջոցները Թեհրանի դեմ արգելում են հարձակողական զինատեսակների մատակարարումները, իսկ С-300 համալիրները պաշտպանական համակարգ են: Իրանի ՊՆ-ն գրեթե 4 մլրդ դոլար է գնահատում ռուսական С-300 զենիթահրթիռային համակարգերի առաքման ձախողումը»: