Քաղտեխնոլոգ Կարեն Քոչարյանը հեգնանքով է արձագանքում տեղեկությանը, թե «Ինֆորմացիայի ազատության կենտրոնի» «Ոսկե բանալի և ժանգոտ կողպեք» ամենամյա մրցանակաբաշխությանը Երևանի քաղաքապետարանին վատ աշխատանքի համար շնորհվել է «ժանգոտ կողպեք» մրցանակը: «Լավ էլ բաց են, ո՞նց են փակ, էնքան բաց են, որ ասում են՝ ես քու…»,-Tert.am-ի հետ զրույցում ասաց նա։
Թեև նա նշեց, թե իրականում ինքը չի հետևում քաղաքապետարանի հասարակայնության հետ կապերի վարչության աշխատաոճին, սակայն ակնհայտ է, որ «Ֆեյսբուք» սոցիալական ցանցում, ըստ նրա, բավական «ֆեյքեր» են պահվում հատուկ նրանց աշխատանքը գովելու նպատակով: «Կարծում եմ՝ նրանք ավելի շատ «ֆեյքեր» են նստացրել քաղաքապետարանում, քան իրականում կարող են աշխատել։ Ավելի ճիշտ կանեն այդ «ֆեյքերի» փոխարեն ավելի բաց աշխատեն, ոչ թե այդ «ֆեյքերին» դնեն, որ նրանք էլ գովեն «Ֆեսյբուքում» իրենց աշխատանքը»,- ասաց նա։
Իսկ այն, որ նույն «Ինֆորմացիայի ազատության կենտրոնը» տարիներ առաջ «Ոսկե բանալի» է տվել նույն քաղաքապետարանին, Կարեն Քոչարյանը բացատրել չի կարող, քանի որ ինքն ակնհայտորեն նրանց աշխատանքում փոփոխություն չի նկատել։ «Այդ կողպեքներն ու բանալիներն էլ ես համարում եմ «գլամուռ» ինչ-որ բան։ Մի քանի տարի առաջ ինչի բա՞ց էր աշխատում, ես չգիտեմ, չեմ հետևել»,- ասաց նա: Վերջինս արդարության համար նշեց, թե չի կարծում, թե մյուս գերատեսչությունները շատ ավելի լավ են աշխատում. «Ես չեմ հետևում՝ ով ինչ տեղեկություն է տալիս, որովհետև փորձը ցույց է տալիս, որ ՀՀ բոլոր պետական գերատեսչությունները միատեսակ են ինֆորմացիա հասցնում հասարակությանը և շատ են դրանց մեջ օֆիցիոզ, պաշտոնական տեղեկատվությունը, կամ էլ որևէ հարցի դեպքում արձագանքը, թե հետևեք մեր կայքին՝ այնտեղ գրված է»։
Հարցին, թե չի՞ հետևել նույնիսկ Տարոն Մարգարյանի աշխատանքի լուսաբանմանը, ինչը շատ հրապարակային է արվում, Կարեն Քոչարյանն արձագանքեց. «Ես չեմ ուզում որևէ բան ասել, բայց այդպիսին են Հայաստանի բոլոր գերատեսչությունները՝ վերևից ներքև, որոնք ցույց են տալիս, թե տվյալ գերատեսչության ղեկավարը գնաց էս բացեց, թե էս արեց, էն արեց, ստեղ գնաց, էնտեղ գնաց»։ Քաղտեխնոլոգը նույնիսկ օրինակ բերեց, թե ինչպես էր նույն թեմայի շուրջ «Ֆեյսբուքում» արձագանքել Պետրոսը Ղազարյանը։ «Երբ գրել էին, թե Տարոն Մարգարյանը դուրս է եկել շրջայցի, գրել էր. «Ես հիմա Կենտրոն հեռուստատեսությունում դուրս եմ եկել շրջայցի և մտել եմ մոնտաժնի»։ Ես իր այդ ասածի հետ համաձայն եմ, այսինքն՝ մարդիկ իրենց գործն են անում, դա իրենց պարտականությունն է, բայց դա ներկայացնել երևանցիներին որպես իրենց աշխատանքի համար լավություն՝ չգիտեմ ինչքանով է ճիշտ»,- նշեց նա և ավելացրեց, թե իրեն, որպես քաղաքացի, ավելի հաճելի կլիներ ոչ թե հեռուստացույցով 38 հատ շրջայց դիտեր, այլ որ քաղաքը բարեկարգված ու մաքուր տեսներ։
«Իհարկե, լավ բաներ էլ ենք տեսնում, բայց երբ տեսնում եմ, որ ամեն անձրևի հետ մեկտեղ ջուրը լցվում է՝ քաղաքը ծածկում, որ չկա ջրահեռացման համակարգ, և Նոյյան տապան է պետք, ուզում է հազար անգամ շրջայց անի, դա ինձ ընդհանրապես չի հետաքրքրի: Այդքանից հետո, որ տեսնում եմ քաղաքում ջրհեղեղ է»,- նշեց նա:
Վերջում Կարեն Քոչարյանը ամփոփեց, թե իրենց գործն է, թե ինչպես են նախընտրում իրենց աշխատանքը ներկայացնել, բայց խնդրում է չներկայացնել այդպես կացնային։ «Դե իրենց գործն են անում, գուցե լուսաբանում են իրենց գործը: Լավ են անում, դեմ չեմ դրան, բայց ուրիշ խնդիր կա, որ Հայաստանում գրեթե բոլորը, բայց առավել ևս քաղաքապետարանը, անում է նենց կացնային, նենց քառակուսի, որ սկսում է զռռալ, որ մեկն այդտեղ նստած ասում է՝ եկեք սենց անենք»,- եզրափակեց նա:
Մեզ հետ զրույցում Ժուռնալիստների միության նախագահ Աստղիկ Գևորգյանն այդ մասին ասաց, որ որոշման արդարացիության մասին չի կարող դատել, որովհետև դա այն կազմակերպությունն է, որ խորապես հետևում է արդարության հարցին: «Տարիներ առաջ նույն քաղաքապետարանին «Ոսկե բանալի» տվեց ինֆորմացիայի ազատության և հասանելիության համար, հիմա թե ինչ են նկատի ունեցել, որ «ժանգոտ կողպեք» են տվել, չեմ կարող ասել»,- ասաց նա:
Ինֆորմացիայի ազատության առումով Ժուռնալիստների միության նախագահը կարծում է, որ քաղաքապետարանը նորմալ է գործում, տեղեկատվություն տրամադրում է. «Իմ կարծիքով՝ նորմալ է աշխատում, նայած թե որ կողմից ենք նայում»:
Հարցին, թե արդյոք տրանսպորտի գնի հետ կապված վերջին իրադարձություններո՞վ է պայմանավորված, որ քաղաքապետարանը «ժանգոտ կողպեքի» է արժանացել, Աստղիկ Գևորգյանը պատասխանեց. «Կարծում եմ, որ կողպեքով ու բանալիով չէ. ամեն մի կազմակերպություն պետք է հրապարակային աշխատի, տեղեկատվություն տրամադրի լրատվամիջոցներին և հանրությանը, չի կարելի դա չանել: Հիմա հնարավոր է, որ ուսումնասիրել են միայն տրանսպորտի սակագնի հարցով տեղեկատվություն տրամադրելը, հնարավոր է, որ ընդհանուր են դիտարկել, չեմ կարող ասել»:
