«Սեպտեմբերի 18-ին ՀՀ ավելի քան 100 հասարակական-քաղաքական գործիչներ, մտավորականներ, այդ թվում' ԱԺ 8 պատգամավոր, միջնորդություն են ներկայացրել Վերաքննիչ դատարանին' պատրաստակամություն հայտնելով անձնական երաշխավորությամբ հանդես գալ, որպեսզի փոխվի քաղաքացիական ակտիվիստ Տիգրան Առաքելյանի խափանման միջոցը»,-այս մասին այսօր Ազգային ժողովում հայտարարեց ԱԺ ՀԱԿ խմբակցության պատգամավոր Նիկոլ Փաշինյանը:

 

Վերջինիս խոսքերով՝ 8 պատգամավոր երաշխավորել է, որ Տիգրան Առաքելյանը կդրսևորի այնպիսի վարքագիծ, որը սահմանված է ՀՀ քրեական դատավարության օրենսգրքով:

 

«Ի հեճուկս սրա' դատարանը նույնն է թողել Տիգրան Առաքելյանի խափանման միջոցը՝ կալանքը, ինչն այս միջնորդության առկայության պարագայում ևս մեկ անգամ հաստատում է այն փաստը, որ Տիգրան Առաքելյանի նկատմամբ իրականացվում է քաղաքական հետապնդում: Ելնելով վերը նշվածից' հիմա այստեղ արձանագրում եմ, որ Տիգրան Առաքելյանը քաղբանտարկյալ է. ես Տիգրան Առաքելյանին համարում եմ քաղբանտարկյալ և պահանջում եմ անհապաղ ազատ արձակել նրան,-հայտարարեց Փաշինյանը:

 

Վերջինիս ի պատասխան' Հովիկ Աբրահամյանն ասաց. «Ես Ձեզ խնդրում եմ' դուք ձեզ Գլխավոր դատախազի լիազորությունները մի' վերապահեք և մեղադրանքներ մի' հնչեցրեք: Ինձ մոտ այնպիսի տպավորություն է, որ դուք խոսում եք խոսելու համար»: