«Հայաստանում նորություն չկա, սցենարը նույնն է' շեղել ժողովրդին գլխավոր հարցից, որ իշխանությունն անարդար է և ոչ լեգիտիմ»,- այսօր լրագրողների հետ հանդիպմանն ասաց Ժողովրդական կուսակցության ղեկավար Տիգրան Կարապետյանը:
Ըստ նրա' գլխավոր խնդիրը ժողովրդի ներկայիս վիճակն է, ծանր ապրուստը, սակայն հասարակությունը հիմնականում զբաղված է ինտրիգներով: Կարապետյանը գտնում է, որ Հայաստանում պետք է առաջանան այնպիսի ուժեր, որոնք չեն ապավինում դրսի աջակցությանը և կարող են կտրուկ փոխել իրավիճակը: «Իրավիճակը սարսափելի է, սարսափելի, հայը լքում է իր հայրենիքը, հայն իր հայրենիքում վատ է ապրում»,- շեշտեց Տիգրան Կարապետյանը: Տիգրան Կարապետյանը «ժողովրդին շեղելու» սերիայից է համարում նաև «Ժառանգության» անդամ Զարուհի Փոստանջյանի հայտնի հարցը ՀՀ նախագահ Սերժ Սարգսյանին' ԵԽԽՎ նստաշրջանին:
Ավելին' նա գտնում է, որ այս պատմությունն ընդհանրապես իշխանության կազմակերպած դավադրությունն էր: «Հանրապետական պատգամավորը' այն էլ Հովիկ Աբրահամյանի թիմից, իր ձայնը տալիս է Զարուհի Փոստանջյանին: Ի գիտություն ձեզ' հանրապետականը, առանց ցուցում ստանալու, կնոպկա չի սեղմում…Հենց այնպես տալ ձայնը… պետք է ինտրիգ, պետք է ժողովրդին շեղել, որն արդեն 20 տարի շատ լավ հաջողվում է իշխանությանը,- ասաց Տիգրան Կարապետյանը,-Մի ֆիլմ կա, որ ասում է' «меня мучают мутные сомнения», ՀՀԿ-ականն իր ձայնը տվել է' իմանալով Զարուհի Փոստանջյանի բնավորությունը»:
Մեր հարցին' ամեն դեպքում նման հարցի բարձրաձայնումը եվրոպական հարթակում հեղինակազրկում է Հայաստանի Հանրապետությանը, թե ոչ, նա պատասխանեց. «Այո´, ապավինել դրսի ուժերին, նշանակում է ցույց տալ, որ մենք ի վիճակի չենք ներսում բան փոխել: Հետո, գիտեք ինչ, մեծ առումով' կա գլխավոր խնդիր' մեր իշխանությունն անարդար է, թալանչի է: Այդ գլխավոր խնդիրը թողած' երկրորդ խնդրի վրա ենք ուշադրություն դարձնում…Իշխանությունը միշտ պետք է պայքար ձևացնի, որ ինչ-որ ուժեր կան… Կազինոն մեղադրան չի, ի՞նչ կազինո, մենք չգիտեի՞նք, որ ինքը խաղում է, գիտեինք, չէ՞, առաջին անգամ չէ, որ բարձրացվում է այդ հարցը»:
Ի դեպ, Տիգրան Կարապետյանը տեղեկացրեց, որ վերջերս է վերադարձել Հայաստան և վերջին 6 ամիսների ընթացքում շրջագայել է ողջ աշխարհով մեկ' լինելով 9 երկրներում, իսկ ասուլիսի վերջում: Վերջում Տիգրան Կարապետյանը կրկին վերադարձավ «կազինոների» թեմային: «Երեկ էր, երբ էր, մի լրագրողուհի ասում է' «պարոն Կարապետյան, խաղատներ այցելո՞ւմ եք»: Ասեցի' բացի «գեյ» ակումբներից ամեն տեղ այցելում եմ»,- ծիծաղելով ասաց Տիգրան Կարապետյանը:
