Հայ դատի ԱՄՆ հանձնախումբը ողջունում է ԱՄՆ պետքարտուղարության նախնական հայտարարությունը Քեսաբում տեղի ունեցող իրադարձությունների վերաբերյալ իր մտահոգությունների մասին և անհամբերությամբ սպասում է, որ պետքարտուղարության հետ վերջին խորհրդակցությունների ընթացքում հնչած խոսքերը կվերածվեն կոնկրետ գործողությունների ի պաշտպանություն Քեսաբի, Հալեպի և ողջ Սի րիայի քրիստոնյաների, հայերի և վտանգի տակ գտնվող մյուս փոքրամասնությունների: Այս մասին հայտարարել է Հայ դատի ԱՄՆ հանձնախմբի նախագահ Քեն Խաչիկյանը:
«Այնուամենայնիվ, մենք մտահոգված ենք վարչակազի լռությամբ' այն պարագայում, երբ ծայրահեղական ուժերի միջսահմանային հարձակումները դյուրացնելու գործում Թուրքիայի մասնակցությունը մատնանշող համոզիչ ապացույցեր կան, և ակնկալում ենք, որ պետքարտուղար Քերին խիստ հաղորդագրություն կուղարկի էրդողանի վարչակազմին' այս հարձակումներում Թուրքիայի մեղսակցությունը դադարեցնելու պահանջով»,- նշել է Խաչիկյանը:
Երեկ ԱՄՆ պետքարտուղարությունը իր մտահոգությունն է հայտնել Քեսաբում կռվի ու վայրագության դեպքերի կապակցությամբ: «Մենք խորապես անհանգստացած ենք Քեսաբում (Սիրիա) կռվի ու վայրագության դեպքերի կապակցությամբ, որը, վտանգելով հայ համայնքի կյանքը, շատերին ստիպել է փախուստի դիմել», - մարտի 28-ի ճեպազրույցում ասել էր պետքարտուղարության մամուլի փոխխոսնակ Մարի Հարֆը: Այնուամենայնիվ, ԱՄՆ արտաքին գործերի գերատեսչությունը խուսափել է դատապարտել Թուրքիայի մասնակցությունը «Ալ Քաիդային» հարող ահաբեկչական խմբավորումների մուտքը Քեսաբ դյուրացնելու գործում:
